عورت کے لئے عورتوں کے گروپ میں عمرہ پر جانےکا حکم

کیا فرماتے ہیں مفتیانِ کرام اس مسئلہ کے بارے میں کہ میں اور میری بیوی اگلے مہینے عمرہ پر جا رہے ہیں ، ہمارے ساتھ میری ایک سالی جس کی عمر تقریباً ساٹھ سال سے اوپر ہے ، وہ بھی جانا چاہتی ہے ، تو کیا شرعاً اس کی گنجائش ہے یا نہیں ؟ اور اگر وہ الگ فلائٹ سے جائے اور الگ کمرہ میں رہے ، تو اسکا کیا حکم ہے ؟ اسی طرح اگر وہ عورتوں کے گروپ میں عمرہ کے لئے جائے ، تو جاسکتی ہے یا نہیں ؟

الجوابُ حامِدا ًو مُصلیِّا ً

واضح ہو کہ عورت خواہ جوان ہو یا عمر رسیدہ ، اسکے ساتھ مسافتِ شرعی کے بقدر سفر کے دوران شوہر یا محرم کا ہونا شرعاً لازم اورضروری ہے ، اور بغیر محرم کے اس کیلئے سفر کرنا شرعاً جائز نہیں ، لہٰذا سائل کی سالی کا سائل یا خواتین کے گروپ کے ساتھ شوہر اور محرم کے بغیر عمرہ کے سفر پر جانا شرعاً جائز نہیں ، جس سے احتراز لازم ہے ۔

مأخَذُ الفَتوی

کما فی صحیح مسلم : عن عبد اللہ بن عمر ، عن النبي صلى الله عليه و سلم قال : « لا يحل لامرأة تؤمن بالله و اليوم الآخر ، تسافر مسيرة ثلاث ليال إلا و معها ذو محرم » ۔ (2/ 975)۔
و فی الهندية : (و منها المحرم للمرأة) شابة كانت أو عجوزا إذا كانت بينها و بين مكة مسيرة ثلاثة أيام هكذا في المحيط اھ (1/ 218)۔