محترم !میں نے احرام باندھا اور عمرہ کی نیت کی، جب میں جدہ سے مکہ جاتے ہوئے چیک پوسٹ پر پہنچا تو سیکورٹی والے نے حج کی وجہ سے مجھے عمرہ کرنے کہ اجازت نہیں دی اور میں جدہ واپس آگیا، اب مجھے دم ادا کرنا ہوگا یا نہیں؟ اور احرام کےبعد میں نے دعا کی کہ اگر میں کسی پریشانی کی وجہ سے عمرہ نہیں کروں گا ، تو اللہ مجھے معاف فرمائے، براہ ِکرم میری رہنمائی کریں۔
سائل نے اگرعمرہ کی نیت کر کے تلبیہ پڑھ لیا ہو، جس کےبعد انتظامیہ نے اسے عمرہ کی ادائیگی سے روک دیا ہو، تو شرعاً سائل محصر (یعنی عمرے سے روکے جانے والا ) شمار ہوگا ، اور ایسی صورت میں سائل کو احرام سے نکلنے کے لئے از خود یا کسی کے توسط سے حدودِ حرم میں دم دینا لازم ہوگا، چنانچہ اس کی جانب سے حدودِ حرم میں بطورِ دم جانور ذبح کیے جانے کے بعدوہ احرام سے نکل جائے گا،تاہم سائل کے ذمہ آئندہ کے لئے عمرہ کی قضاء بھی لازم ہوگی۔
کما فی الدر المختار : ( و علی المعتمر عمرۃ )الخ
و فی الشامیۃ تحت : ( قولہ و علی المعتمر عمرۃ ) أی علی المعتمر إذا حصر قضاء عمرۃ و ھذا فرع تحقق الإحصار عنھا الخ ( باب الإحصار ، ج 2 ، ص 593 ، ط: سعید)۔
و فی التاتارخانیۃ : و إن کان مفردا بالعمرۃ فعلیہ عمرۃ مکانھا الخ ( کتاب الحج ، ج 3 ، ص 635 ، ط: رشیدیۃ)۔
و فی الھدایۃ : و إذا أحصر المحرم بعدو أو أصابہ مرض فمنعہ من المضی جاز لہ التحلل بالھدی الخ ( باب الإحصار ، ج 1 ، ص 437 ، ط: دارالسلام)۔