دوبارہ اسلام میں داخل ہونے کا طریقہ

اگر کسی کو گیس کا مسئلہ ہو اور وہ گیس کو روک روک کر نماز پڑھتا ہے اور نماز میں بھی اس کو وضو کے ٹوٹنے کا ڈر رہتا ہو اور یہ بھی ڈر ہیں کیا وہ اسلام سے خارج نہ ہو جائے راہ نمائی فرمائیں ۔
(۲) اگر کوئی شخص کسی گناہ کی وجہ سے اسلام سے خارج ہو جائے تو وہ دوبارہ اسلام کیسے قبول کریں؟ تفصیل سے بتا دیں آپ کی بہت مہربانی ہوگی۔

الجوابُ حامِدا ًو مُصلیِّا ً

۱۔ محض ریح یعنی گیس کی بیماری خروج عن الاسلام کا باعث نہیں، بلکہ اس بیماری کے دوران پورے نماز کے وقت میں مثلاً شروع وقت ظہر سے اخیر وقت ظہر تک اتنا وقت نہ ملتا ہو کہ وہ کامل طہارت کے ساتھ صرف فرض نماز ادا کر سکے تو شرعا وہ معذور کے حکم میں داخل ہوگا، اس صورت میں اسے چاہیے کہ وہ ہر نماز کے وقت وضو کر لیا کرے اور اس پورے وقت میں نماز اور دیگر عبادات بجا لا سکتا ہے۔ بشرطیکہ کوئی دوسرا ناقض وضو ظاہر نہ ہو اور اگر ایسی صورت حال نہ ہو تو پھر وہ معذور بھی شمار نہیں ہوگا۔
۲۔ العیاذ باللہ اگر کوئی مسلمان کلمہ کفر وغیرہ کے ارتکاب کی وجہ سے دائرہ اسلام سے خارج ہو جائے تو اپنے اس گناہ پر ندامت کی ساتھ بصدق دل تو بہ واستغفار کرے اور کلمہ شہادت پڑھ کر دوبارہ اسلام میں داخل ہو جائے اور آئندہ کے لیے گناہوں سے بچنے کا پورا اہتمام کرے۔

مأخَذُ الفَتوی

کما فی الدر المختار: (وصاحب عذر من به سلس) بول لا يمكنه إمساكه (أو استطلاق بطن أو انفلات ريح أو استحاضة) )الى قوله( (ثم يصلي) به (فيه فرضا ونفلا) فدخل الواجب بالأولى (فإذا خرج الوقت بطل) أي: ظهر حدثه السابق، حتى لو توضأ على الانقطاع ودام إلى خروجه لم يبطل بالخروج ما لم يطرأ حدث آخر أو يسيل كمسألة مسح خفه. (1/ 305)
وفيه ايضاً : وكل مسلم ارتد فتوبته مقبولة اھ (4/ 231) والله تعالى أعلم