کسی مجبوری کی وجہ سے کاروبار کا انشورنس کروانا

السلام علیکم، میرا سوال یہ ہے کہ میری کمپنی امریکہ میں رجسٹرڈ ہے، اور اسی کے قانون کے مطابق چل رہی ہے، وہاں پر جس کمپنی کے ساتھ میری کمپنی بزنس کرنا چاہتی ہے وہ ایک بزنس انشورنس کا تقاضا کر رہی ہے جس کے بغیر وہ میری کمپنی کے ساتھ بزنس نہیں کریگی، اس انشورنس سے فائدہ حاصل کرنے کا کوئی ارادہ نہیں ہے ناہی اسے دل سے اچھا جانتا ہو بلکہ نقصان کی صورت میں خود اس نقصان کو پورا کرونگا، پر جس کمپنی کے ساتھ بزنس کرنا ہے وہ کہتی ہے کہ یہ انشورنس ضروری ہے، کیا میں صرف کام حاصل کرنے کے لئے یہ انشورنس کروا سکتا ہوں جبکہ میں اس انشورنس سے فائدہ حاصل کرنے کا ارادہ نہیں رکھتا ؟

الجوابُ حامِدا ًو مُصلیِّا ً

صورتِ مسئولہ میں اگر واقعۃً مذکور کمپنی کے ساتھ بزنس کرنے میں قانوناً انشورنس کروانا لازمی ہو یا انشورنس کے بغیر کاروبار ممکن ہی نہ ہو تو ایسی مجبوری کی صورت میں سائل کیلئے انشورنس کرانے کی گنجائش ہے، البتہ نقصان کی صورت میں صرف اتنی رقم واپس لی جائے جتنی رقم پریمیم کے طور پر جمع کرائی گئی ہو اس سے زائد رقم وصول نہ کی جائے۔

مأخَذُ الفَتوی

کما فی قولہ تعالیٰ: {أَحَلَّ اللَّهُ الْبَيْعَ وَحَرَّمَ الرِّبَا}الآیة [البقرة: 275]
و فی قواعد الفقہ: الضرورات تبیح المحظورات۔اھ (ص:89)
و فی الموافقات للشاطبی: الضروريات: هي التي لا بد منها في قيام مصالح الدين والدنيا، بحيث إذا فقدت لم تجر مصالح الدنيا على استقامة، بل على فساد وتهارج وفوت حياة، وفي الأخرى فوت النجاة والنعيم، والرجوع بالخسران المبين۔۔۔۔۔۔مجموع الضروريات خمسة، وهي: الدين، والنفس، والنسل، والمال، والعقل۔اھ (ص:319)