شوہر سے کئی عرصہ الگ رہنے کی صورت میں طلاق کے بعد عدت لازم ہوگی ؟

میرے شوہر نے مجھے غصّے میں کال پہ تین طلاق دے دی ہیں، اب غصّہ ٹھنڈا ہوگیا ہے اور ہم پھر ایک ہونا چاہتے ہیں، چونکہ وہ باہر ملک میں رہتے ہیں تو ہمارا کوئی ازدواجی تعلق نہیں کافی مہینے سے، ہم نے اپنے گھر پہ نہیں بتایا ہے کچھ،ان کے ساتھ رجوع کرنے کا اسلامی طریقہ بتا دیں۔
عدت کتنے دن گزارنی ہوگی؟دوبارہ نکاح کرنے کے لئے میرے باپ بھائی کی موجودگی ہونا ضروری ہے؟
پہلے والا حق مہر انہیں اب مجھے دینا ہوگا اور دوبارہ نکاح پہ دوبارہ حق مہر رکھنا ہوگا؟
دوبارہ ان سے نکاح کرنے کا کیا طریقہ ہوگا؟
اگر حلالہ کرنا ہوا تو وہ اس کا طریقہ بھی بیان کردیں۔
جزاک اللّہ

الجوابُ حامِدا ًو مُصلیِّا ً

صورت مسئولہ میں اگر سائلہ کی رخصتی ہوچکی ہو اور اس کے بعد دونوں کے درمیان ازدواجی تعلق قائم ہواہو، تو اب اس کے شوہر نے فون پر واضح الفاظ (جیسے میں تمہیں طلاق دیتاہوں، میں نے طلاق دی وغیرہ) کے ساتھ تین طلاقیں دیدی ہو، تو اس سےسائلہ پر تینوں طلاقیں واقع ہوکر حرمت ِمغلظہ ثابت ہوچکی ہے اب رجوع نہیں ہوسکتا اور حلالہ شرعیہ کے بغیر دوبارہ باہم عقدِ نکاح بھی نہیں ہوسکتا، جبکہ سائلہ ایام عدت (جو کہ حمل نہ ہونے کی صورت طلاق کے وقت سے تین ماہواریوں کا مکمل ہونا ہے) کسی دوسری جگہ نکاح کرنے میں آزاد ہے، اور سائلہ کا شوہر سے الگ رہنے کی وجہ سے عدت ساقط نہ ہوگی ۔
جبکہ رخصتی کے بعد زداوجی تعلق قائم کرنے یا خلوت صحیحہ کے بعد طلاق دینے کی صورت میں شوہر کے ذمہ پوری حق مہر کی ادائیگی لازم ہوگی، اسی طرح دوبارہ نکاح کرنے کے لیے حلالہ شرعیہ بھی ضروری ہے،جس کا طریقہ یہ ہے کہ سائلہ اپنے شوہر سے علیحدگی اور عدت کے بعد بغیرکسی شرط کے کسی دوسرے مسلمان شخص سے اپناعقد نکاح کرے ،ایساکرنے سے وہ اس دوسرے شخص کی بیوی بن جائے گی، اب اگروہ دوسراشخص بھی ایک مرتبہ ہمبستری (جوکہ حلالہ شرعیہ کے تحقق کے لئے ضروری ہے)کے فوراً بعد یا ازدواجی زندگی کے کچھ عرصہ بعد طلاق دیدے یا طلاق تو نہ دے مگر بیوی سے پہلے اس کا انتقال ہوجائے۔بہرصورت اس کی عدت گزرنے کے بعد وہ پہلے شوہر کے عقدنکاح میں آناچاہے اور پہلاشوہربھی اسے رکھنے پر رضامندہوتو نئے مہرکیساتھ گواہوں کی موجودگی دوبارہ عقدنکاح کرکے باہم میاں بیوی کی حیثیت سے زندگی بسرکرسکتے ہیں۔تاہم حلالہ اس شرط کے ساتھ کرناکہ زوج ثانی ہمبستری کے بعدبیوی کو طلاق دےگاتاکہ زوج اول دوبارہ اس کے ساتھ عقدنکاح کرےیہ مکروہ تحریمی ہے،اور اس پر حدیث شریف میں وعید بھی وارد ہوئی ہے،اس لئے اس سے احتراز لازم ہے۔جبکہ بلاشرط بلاشبہ جائز اور درست ہے۔

مأخَذُ الفَتوی

قال اللّٰہ تعالیٰ : اَلطَّلاَقُ مَرَّتٰنِ (الہ قولہ) فَإِنْ طَلَّقَہَا فَلاَ تَحِلُّ لَہٗ مِنْ بَعْد حَتّٰی تَنْکِحَ زَوْجًا غَیْرَہٗ الایۃ( البقرۃ آیت : 229،230)
وقال اللیث عن نافع کان ابن عمر إذا سئل عمن طلق ثلاثا قال: قال لوطلقت مرۃ أو مرتین فإن النبي صلی ﷲ علیہ وسلم أمرني بہذا فإن طلقہا ثلاثا حرمت حتی تنکح زوجا غیرہ۔ (بخاري شریف،کتاب الطلاق ج2ص292)
وفی تنویرالابصار:ویقع طلاق کل زوج بالغ عاقل ولوعبدااومکرھا اوھازلا اوسفیھا او سکران اھ(ج3ص235)
وفی الھدایۃ:وان کان الطلاق ثلاثافی الحرۃ واثنتین فی الامۃ لم تحل لہ حتی تنکح زوجاغیرہ نکاحا صحیحاً ویدخل بھا ثم یطلقھا اویموت عنھا اھ(ج2ص399)