حکومت سے سودی قرضہ لینے کا حکم

کیا فرماتے ہیں علماءِ کرام ومفتیانِ عظام اس مسئلہ کے بارے میں کہ حالات زندگی کچھ یوں ہے کہ میں چھٹے (۶) گریڈ کا سرکاری ملازم ہوں، آنکھ کھولی ہے تو والد صاحب کو سخت مشقت کا کام کاج کرتے ہوئے دیکھا ہے میری سات بہنیں ہیں، والد صاحب نے بیرون ممالک کما کر پانچ بہنوں کی شادی کی ہے دو بہنیں باقی ہیں ، جن کی شادی کروانی ہے ۔ والد صاحب ابھی بھی مزدوری مشقت والا کام کرتے ہیں، مجھ سے چھوٹے دو بھائی ہیں وہ بھی بے روزگار ہیں، اللہ تعالیٰ سے دعا کرتا ہوں کہ مجھے اتنا بڑا روزگار عطاء کر دیں کہ میں والد صاحب کی بھرپور مدد کر سکوں تاکہ والد صاحب باقی زندگی بیٹھ کر آرام سے گزاریں۔ میرے والد لاہور میں رہتے ہیں، اور میں اندرون سندھ میں رہتا ہوں جس میں میری رہائش ہے وہ مکان والد صاحب کا ہے اور والد صاحب مجھ سے ہر ماہ کرایہ لیتے ہیں۔ ابھی دو بہنوں کی شادیاں والد صاحب نے کرنی ہیں جس کی وجہ سے والد صاحب پریشان رہتے ہیں اور میں والد صاحب کو پریشان دیکھ کر وقت سے پہلے بوڑھا ہو چکا ہوں، والد صاحب کے لئے ہر نماز کے بعد دعا بھی کرتا ہوں کہ میرے مولا میرے والدین پر رحم فرما ، جس طرح انہوں نے مجھ پر بچپن میں شفقت فرمائی۔ آپ صاحبان سے دریافت کرنا ہےکہ حکومتِ پاکستان نے سرکاری ملازمین کو چوبیس (۲۴) تنخواہیں ایڈوانس میں سود کے ساتھ دینے کا اعلان کیا ہے، جو کہ ہر ماہ تنخواہ میں سے کٹوتی کر لیتی ہے میرے حالات کو مد نظر رکھتے ہوئے فرمائیں کہ میں اپنے والدین کی مدد کے لئے یا بہنوں کی شادی کرانے کے لئے حکومت سے قرضہ تنخواہوں کی صورت میں لے سکتا ہوں کہ نہیں؟ میری تحریر کو دو مرتبہ پڑھ کر جواب سے مطلع فرمائیں۔تو جناب کی عین نوازش ہوگی ۔
نوٹ ۔ یہ قرضہ حکومت اپنے اکاؤنٹ سے دیتی ہے اور کٹوتی کی صورت میں جو سود لیتی ہے ہر ماہ حکومت اپنے اکاؤنٹ میں رکھتی ہے۔

الجوابُ حامِدا ًو مُصلیِّا ً

سوال میں مذکور معاملہ سود پر مبنی ہونے کی وجہ سے شرعاً جائز نہیں، اس سے احتراز لازم ہے ۔ البتہ اگر کسی دوست و رشتہ دار و غیرہ سے قرضہ حسنہ لے لیا جائے۔ اور اس میں سود کی کوئی ترتیب نہ ہو۔ تو یہ عمل بلا شبہ جائز اور درست ہے۔

مأخَذُ الفَتوی

کمافي مشكاة المصابيح: عن جابر رضي الله عنه قال : لعن رسول الله صلى الله عليه و سلم آكل الربا وموكله وكاتبه وشاهديه وقال: "هم سواء" . رواه مسلم (2/ 134)۔
وفی الشامیۃ: قولہ کل قرض جر نفعاً حرام،ای اذا کان مشروطاً اھ(5/166)۔