ایسی کمپنی میں انویسٹمنٹ کرکے نفع کمانا،جو غیر مقبوضہ چیزیں آگے فروخت کرتی ہو

کیا فرماتے ہیں علماءِ کرام اور مفتیانِ عظام اس مسئلہ کے بارے میں کہ ایک کمپنی ’’میگا شاپنگ‘‘ کے نام سے ہے، جس کا طریقۂ کاروبار یہ ہے کہ وہ لوگوں سے کچھ رقم لیتی ہے اور اس کے ذریعے نیٹ پر ہی کاروبار کرتی ہے اور اس کا روبار میں (گولڈ، ائل، سلور، اور کرنسی وغیرہ) اشیاء کی خرید و فروخت ہوتی ہے، جس کے ذریعہ رقم لگائے ہوئے افراد خرید و فروخت کرکے نفع حاصل کرتے ہیں۔ اور کبھی نقصان بھی اٹھانا پڑتا ہے۔ اور یہ سارا کاروبار محض نیٹ پر ہی ہوتا ہے۔ کیا شریعت کی رو سے اس طرح کا کاروبار کرنے اور اس کا ممبر بننا جائز ہے یا نہیں ؟ جواب عنایت فرماکر عند اللہ ماجور ہوں ۔

الجوابُ حامِدا ًو مُصلیِّا ً

منقولی اشیاء کی آگے بیع درست ہونے کے لئے ضروری ہے کہ بیچی جانے والی چیز پر قبضہ ہو جبکہ صورتِ مسئولہ میں مذکور قسم کے کاروبار میں عموماً مبیع پر قبضہ نہیں ہوتا بلکہ یونہی فرق برابر کر کے نفع کمایا جاتا ہے اور یہ شرعاً ناجائز اور حرام ہے، البتہ کسی شخص کا کوئی وکیل اور نمائندہ ہو وہ اس کی طرف سے مبیع پر قبضہ کر کے اور آگے اس کی فروخت کرے تو یہ شرعاً بھی جائز اور درست ہو جائیگا اور اس سے حاصل ہونے والا نفع بھی جائز اور حلال ہوگا۔

مأخَذُ الفَتوی

کمافی صحیح مسلم: عن ابن عباس قال قال رسول اللہ ﷺ من ابتاع طعاماً فلایبعہ حتیٰ یقبضہ قال ابن عباس وأحب کل شیئ بمنزلۃ الطعام اھ(2/ص5)۔
وفی البحر الرائق: (قولہ لایبع المنقول) ای لایصح لنھیہ۔ﷺ۔ عن بیع مالم یقبض ولان فیہ غرر انفساخ العقد علیٰ اعتبار الھلاک اھ(6/116)۔
وفی الھندیۃ: کل عقد جاز ان یعقدہ الانسان بنفسہ جاز ان یؤکل بہ غیرہ اھ (3/185)۔