شرکت کے نام پر پیسے لے کر ذاتی استعمال میں لانے کا حکم

السلام علیکم
ابوبکر نے ایک لاکھ کے سرمایہ سے عمر و کے ساتھ مضاربت پر 50 فیصد پر کام شروع کیا دس سال بعد سالانہ نفع ملا کر ابوبکر کا سرمایہ 12 لاکھ اور عمر و کا 8 لاکھ ہو چکا ہے۔اب ابوبکر کا دوست عثمان 2 لاکھ اس کام میں لگانا چاہتا ہے۔ ابوبکر عثمان سے دو لاکھ لے لیتا ہے اور یہ سوچ لیتا ہے کہ اب سے اس کاروبار میں 10 لاکھ اسکے 2 لاکھ عثمان کے اور 8 لاکھ عمر وکے اور جو منافع ابوبکر کا 50 فیصد ہو گا اس میں سے 10 اور 2 کی شرح سے ابوبکر اور عثمان تقسیم کر لیں گے۔کیا ایسا کرنا درست ہوگا ؟کیا یہ سب عمر وکو بتانا ہو گا ؟اور جب عثمان کچھ وقت کے بعد اپنا سرمایہ واپس لینا چاہے تو لے سکتا ہے  ؟

الجوابُ حامِدا ًو مُصلیِّا ً

صورتِ مسئولہ میں ابوبکر کا اپنے دوست عثمان سے دو لاکھ روپے لے کر اپنے پاس رکھ لینا اور اسے عمرو کےساتھ کاروبار میں شریک سمجھ کر منافع دینا ،شرعاً کسی بھی کاروباری عقد (شرکت / مضاربت )کے ضابطے کے مطابق درست نہیں بنتا۔اس لئے یہ دولاکھ روپے ابوبکر کے ذمہ پر عثمان کا قرض ہے اور اس پر منافع دینا خالص سودی معاملہ بنے گاجس سے احتراز لازم ہے ۔

مأخَذُ الفَتوی

کما فی البدائع:(ومنها) تسليم رأس المال إلى المضارب؛ لأنه أمانة فلا يصح إلا بالتسليم، وهو التخلية كالوديعة، ولا يصح مع بقاء يد الدافع على المال؛ لعدم التسليم مع بقاء يده الخ(فصل فی شرائط رکن المضاربۃ ج: 6 ص: 84 ط:دار الکتب العلمیۃ بیروت)۔
و فی الھندیۃ: أما تفسيرها شرعا فهي عبارة عن عقد على الشركة في الربح بمال من أحد الجانبين والعمل من الجانب الآخر۔۔۔۔(الی قولہ)۔۔۔(وأما) (ركنها) فالإيجاب والقبول وذلك بألفاظ تدل عليها من لفظ المضاربة والمقارضة والمعاملة وما يؤدي معاني هذه الألفاظ الخ(الباب الأول في تفسيرها وركنها وشرائطها وحكمها ج:4 ص: 285 ط: دار الفکر بیروت)۔