شرکتِ صنائع میں منافع کی رقم سے خریدے گئے سامان کا حکم

کیا فرماتے ہیں علماء کرام اس مسئلہ کے بارے میں کہ میں مسمی محمد آزاد لفٹ بنانے کا کام کرتا ہوں، ابتدا میں میں اکیلا کام کرتا تھا چھ ماہ بعد میرے پاس فرزین نامی شخص آیا ،اور دیہاڑی پر کام کرنے لگا، ایک یا دو دن بعد ہم نے شرکت کا معاہدہ کر لیا، اس طور پر کہ دونوں کام لیں گے، اور اس پر جو منافع ہو گا آدھا آدھا تقسیم کریں گے ، اس بات کو زبانی طور پر ہی طے کیا گیا تھا، با قاعدہ نہ کوئی ایگریمنٹ سائن ہوا اور نہ ہی کوئی گواہ موقع پر موجود تھا ،البتہ ایک شخص تھا جس کا انتقال ہو چکا ہے ، تقریبا چار سال ہماری شراکت جاری رہی، دوران ملازمت کبھی کچھ ساز و سامان خریدنے کی نوبت بھی آئی جس میں گیس سلینڈر ویلڈنگ اور مشین وغیرہ شامل ہیں، اکثر کام میں ہی لیا کرتا تھا، میرے پارٹنر فرزین کا حصہ عملا کم تھا، اب اس کا شرکت ختم کرنے کا ارادہ ہے، اور اس کا مطالبہ ہے کہ مذکور سامان میں سے مجھے آدھا حصہ دیا جائے، کیونکہ یہ منافع کی رقم سے خریدا گیا ہے ، سوال یہ کہ آیا مذکور طریقہ سے کاروبار جائز ہے یا نہیں اور مسمی فرزین کا مذکور مطالبہ شرعاً درست ہے؟

الجوابُ حامِدا ًو مُصلیِّا ً

فریقین (سائل آزاد اور فرزین) کے درمیان جو معاملہ ہوا، وہ شرکت صنائع کا تھا ، جس میں اگر چہ دونوں کے کام کرنے میں برابری نہیں تھی، اور سائل اپنے پارٹنر مسمی فرزین کی نسبت زیادہ کام کرتے تھے، مگر ان کے درمیان جو زبانی کلامی معاہدہ ہوا تھا، اس کے مطابق مذکور کام سے حاصل شدہ منافع دونوں کے درمیان آدھو آدھ تقسیم کر نالازم تھا، چنانچہ کام کرنے کے نتیجے میں فریقین کو حاصل شدہ منافع کی رقم سے جو سامان خریدا گیا تھاوہ بھی دونوں فریقین کے درمیان مشترک ہے ، اب اگر دونوں فریق اس شرکت کو ختم کرنا چاہتے ہیں، تو معاملہ کے مطابق نفع سے خریدا گیا سامان بھی دونوں فریقین کے درمیان برابر تقسیم ہو گا، جس کو ایک فریق حصہ کی قیمت دیکر اپنی طرف کر سکتا ہے۔

مأخَذُ الفَتوی

كما في الهداية شرح البداية: قال وأما شركة الصنائع وتسمى شركة التقبل كالحياطين والصباغين يشتركان على أن يتقبلا الأعمال ويكون الكسب بيهما فيجوز ذلك وهذا عندنا اھ (3/ 10) واللہ سبحانہ و تعالی اعلم