خواتین کے اجتماع کیلئے جگہ بنانا

بسم اللہ الرحمن الرحیم،
محترم مفتیانِ کرام دامت برکاتہم!
السلام علیکم ورحمۃ اللہ وبرکاتہ!
بعد از آداب عرض ہے کہ ہمارے گاؤں میں عید الفطر کے دن خواتین عموماً بازاروں میں نکلتی ہیں، نئے کپڑے پہن کر خرید و فروخت اور کھانے پینے کی جگہوں پر جاتی ہیں۔ اس دوران اختلاط، اوباش عناصر کی موجودگی اور بے حیائی کا ماحول پیدا ہو جاتا ہے، جس سے فتنہ کے اندیشات بڑھ جاتے ہیں،
اسی پس منظر میں بعض نوجوانوں نے یہ تجویز پیش کی کہ گاؤں کی سماج واڑی میں عید کے دن صرف خواتین کے لیے ایک محدود اور منظم اجتماع رکھا جائے، جس میں
صرف مستورات کو داخلے کی اجازت ہو،
کسی مرد کو اندر آنے کی اجازت نہ ہو،
انتظام، نگرانی اور اسٹالز وغیرہ تمام خواتین کے ذمہ ہوں،
موسیقی، غیر شرعی سرگرمی یا بے پردگی کی اجازت نہ ہو،
مقصد صرف باحیا ماحول میں خواتین کو مل بیٹھنے اور خوشی منانے کا موقع دینا ہو،
یہ بھی واضح رہے کہ گھر سے سماج واڑی تک آمد و رفت عام گاؤں کی حدود میں ہوگی ،جیسا کہ عام دنوں میں خواتین باہر نکلتی ہیں،
اب سوال یہ ہے کہ:
کیا مذکورہ شرائط کے ساتھ ایسا پروگرام منعقد کرنا شرعاً جائز ہے یا ناجائز؟
اگر ناجائز ہے تو اس کی شرعی علت کیا ہے؟
کیا موجودہ حالات میں بازار کے مختلط ماحول کے مقابلے میں محدود اور غیر مختلط ماحول اختیار کرنا کسی درجہ میں گنجائش رکھتا ہے؟
براہِ کرم قرآن و حدیث اور فقہی اصولوں کی روشنی میں رہنمائی فرمائیں۔
جزاکم اللہ خیراً
والسلام علیکم ورحمۃ اللہ وبرکاتہ

الجوابُ حامِدا ًو مُصلیِّا ً

صورت مسئولہ میں مذکور شرعی حدود و شرائط کا لحاظ رکھنے کے باوجود اس قسم کے اجتماع کی ترتیب قائم کرنے میں بیشمار مفاسد کا اندیشہ قوی موجود رہے گا ،لہذا اس ترتیب کو قائم کرنے سے احتراز بہتر ہے۔

مأخَذُ الفَتوی

کما فی المؤطا للامام مالک: عن عائشة ، زوج النبي صلى الله عليه وسلم، أنها قالت: لو أدرك رسول الله صلى الله عليه وسلم ما أحدث النساء لمنعهن المسجد ، كما منعت نساء بني إسرائيل.(کتاب الجمعۃ،باب خروج النساء الی المساجد،ج:1،ص:213،ط:الرسالۃ)