مضاربت کا معاہدہ وقت سے پہلے منسوخ کرنے کا حکم

کیا فرماتے ہیں علمائے دین و مفتیان شرع متین درج ذیل مسئلے کے بارے میں کہ:
احمد ایک بلڈر ہے جو بلڈنگیں تعمیر کرتا ہے۔ کریم نے احمد کو ایک کروڑ دس لاکھ روپے بطورِ مضاربہ دیئے اور شرعی تقاضے کے مطابق (نفع و نقصان میں شریک ہونے کی بنیاد پر) معاہدہ طے ہوا۔ اس معاہدے کی مدت میں ابھی آٹھ ماہ باقی ہیں۔
اسی دوران کریم نے احمد کو ایک اور معاہدے کے تحت مزید ایک کروڑ ساٹھ لاکھ روپے دیئے اور آپس میں معاملات طے پا گئے۔ اس دوسرے معاہدے کو ابھی تقریباً ایک سال ہو چکا ہے۔
اب کریم کی خواہش ہے کہ احمد کے ساتھ ہونے والے اپنے دونوں معاہدات منسوخ کرے اور تینوں رقوم (پہلے معاہدے کی رقم، اسکا منافع اور دوسرے معاہدے کی رقم) ملا کر ایک اور معاہدہ کیا جائے۔
دریافت طلب امر یہ ہے کہ کیا اس طرح دونوں معاہدات کو منسوخ کرنے کا حق کریم کو حاصل ہے یا نہیں؟
جبکہ احمد دونوں معاہدات کی تنسیخ پر راضی ہے لیکن اس کا کہنا ہے کہ اس طرح کرنا شرعاً درست نہیں ۔
قرآن و سنت اور فقہ حنفی کی روشنی میں واضح جواب عنایت فرمائیں۔
شکریہ

الجوابُ حامِدا ًو مُصلیِّا ً

صورتِ مسئولہ میں اگر کریم اور احمد دونوں باہمی رضامندی سے ابتداءِ معاہدہ میں طے شدہ مدت پوری ہونے سے پہلے مضاربہ کے دونوں معاہدے ختم کرنا چاہیں، تو شرعاً ان کے لیے کاروبار کا حساب و کتاب اور تصفیہ (Liquidation) کرکے دونوں معاہدوں کو فسخ کرنا جائز ہے۔ البتہ معاہدوں کو فسخ کرتے وقت ہر مضاربہ کا الگ الگ حساب کرنا ضروری ہے۔ چنانچہ دونوں کاروباروں کا حساب، تصفیہ اور منافع کی تقسیم کرنے کے بعد اگر کریم اپنے سرمایہ اور منافع کی مجموعی رقم سے، شرعی اصول و ضوابط کے مطابق، احمد کی رضامندی سے نیا کاروباری معاہدہ کرے، تو شرعاً ایسا کرنا جائز اور درست ہے۔

مأخَذُ الفَتوی

كما في شرح المجلة، مادة (1353): «واتفقوا في المضاربة أنه لو فسخاها والمال عروض يصح الفسخ، ولو فسخها أحدهما لا يصح إلا إذا كان نقودا.»