سرمایہ کاری میں طے شدہ منافع اور نقصان کی تلافی کی شرط کا شرعی حکم

السلام علیکم ورحمۃ اللہ وبرکاتہ
محترم مفتی صاحب!
ہم مختلف کاروبار کرتے ہیں، جس میں لوگوں سے رقم بطور سرمایہ وصول کرتے ہیں اور اس کے بدلے انہیں منافع دیتے ہیں۔ منافع کی شرح ہم باہمی رضامندی سے پہلے سے طے کر لیتے ہیں۔ نیز ہم ان لوگوں کو سیکیورٹی بھی دیتے ہیں تاکہ انہیں اطمینان رہے، کیونکہ نیا سرمایہ کار کاروبار میں رقم لگاتے ہوئے اس بات سے ڈرتا ہے کہ اگر کاروبار میں نقصان ہوگیا تو اس کی رقم کا کیا ہوگا۔ چنانچہ ہم سیکیورٹی اپنی طرف سے دیتے ہیں اور اگر کاروبار میں نقصان ہوجائے تو اس نقصان کو بھی ہم خود برداشت کرتے ہیں۔
الحمدللہ! تقریباً چار سال سے ہم یہ کاروبار کر رہے ہیں اور اللہ تعالیٰ کے فضل سے اب تک کوئی نقصان نہیں ہوا، بلکہ صرف نفع ہی ہوا ہے۔
اب سوال یہ ہے کہ کیا ہم اپنی مرضی سے یہ شرط طے کرسکتے ہیں کہ اگر کاروبار میں نقصان ہوا تو ہم سرمایہ کار کو مثلاً اتنے فیصد رقم دیں گے؟
براہِ کرم رہنمائی فرمائیں کہ اس طرح کا کاروبار شرعی اعتبار سے جائز ہے یا نہیں؟ نیز اس سے حاصل ہونے والا نفع حلال ہے یا نہیں؟
جزاکم اللہ خیراً کثیراً۔

الجوابُ حامِدا ًو مُصلیِّا ً

سائل کا کاروبار اگر باقاعدہ رجسٹرڈ ہو اور اسے کاروبار کے لیے لوگوں سے سرمایہ لینے کی اجازت ہو تو ایسی صورت میں سائل کا کاروبار کے لیے لوگوں سے پیسے لینا اور نفع کی تقسیم کے لیے باہمی رضامندی سے کوئی فیصدی تناسب طے کرنا شرعاً جائز اور درست ہے۔ البتہ کاروباری نقصان کی ذمہ داری سے سرمایہ کار کو محفوظ کرنا یا تعدی و غفلت کے بغیر ہونے والے نقصان کی صورت میں بھی پہلے سے کوئی متعین فیصدی رقم دینے کی شرط رکھنا درست نہیں۔ لہٰذا سیکیورٹی کے طور پر اصل سرمایہ کی ضمانت دینا یا نقصان کی صورت میں متعین فیصد رقم دینے کی شرط رکھنے سے اجتناب کرنا چاہیے۔

مأخَذُ الفَتوی

کما فی بدائع الصنائع: (ومنها) : أن يكون الربح جزءًا شائعًا في الجملة، لا معينًا، فإن عينا عشرةً، أو مائةً، أو نحو ذلك كانت الشركة فاسدةً؛ لأن العقد يقتضي تحقق الشركة في الربح والتعيين يقطع الشركة لجواز أن لايحصل من الربح إلا القدر المعين لأحدهما، فلايتحقق الشركة في الربح.(6/59، ط: دار الکتب العلمیۃ)
وفیہ أیضاً: والوضیعة علی قدر المالین متساویا ومتفاضلا؛ لأن الوضیعة اسم لجزء ہالک من المال فیتقدر بقدر المال.(6/ 62، ط: دار الکتب العلمیۃ)
وفی درر الحكام في شرح مجلة الأحكام: فجهالته تفسد العقد (وغيره لا) أي غير ذلك من الشروط الفاسدة لا يفسد المضاربة (بل يبطل الشرط كاشتراط الخسران على المضارب) لأنها جزء هالك من المال فلا يجوز أن يلزم غير رب المال لكنه شرط زائد لا يوجب قطع الشركة في الربح والجهالة فيه فلا يفسد المضاربة(3/459)