طلاق کے بعد عدت کا دورانیہ

السلام علیکم!
جناب محترم صاحب! آپ کی بڑی مہربانی ہوگی،میرے مسئلہ کا جواب دے دیں،میں نے تین مہینے پہلے پوچھا تھا،مجھے جیسا میں نے پہلے بتایا تھا جون کے مہینہ کا , پھر جولائی میں مجھے انیس جولائی اتوار کو فجر پہ گیلا محسوس ہوا تھا ،مگر کچھ نظر نہیں آیا تو نماز پڑھ لی تھی،لیکن صبح ساڑھے نو دس کے قریب دیکھا تو آگئے تھے، پھر وہی جیسا بتایا پچھلی ای میل میں دو دن اچھے صحیح، پھر تیسرے دن کم اور چوتھے روز بدھ بائیس جولائی کو دوپہر میں دیکھا تو صرف ایک براؤن (کتھی رنگ) کا دھاگا تھا؟ پھر اگلے مہینے اگست کی تیرہ جمعرات کو غالباً دوپہر میں مجھے کچھ گیلے کی سی کیفیت تھی، لیکن دیکھا نہیں تھا تو کہہ نہیں سکتی ،پھر اسی دن شام میں یعنی تیرہ اگست کو 6 بجے کے قریب دیکھا تو تھے، اس کے بعد سے اتوار سولہ اگست کو صبح ساڑھے چار بچے لال رنگ میں تھا بس، اس کے بعد کچھ نہیں ہوا یہ جولائی اور اگست کا بتایا ہے،جون کا حال پچھلی ای میل میں لکھا تھا ، اکیس جون کو صبح میں آئے اور بائیس جون کی مغرب تک بلکل اچھے آئے اور تیسرے دن تئیس جون کو دوپہر میں ہلکا سا براؤن دھبہ تھا، نو جون کو طلاق ہوئی آپ اس کے مطابق میری عدت کا بتا دیں مجھے دوسری شادی کرنی ہے؟

الجوابُ حامِدا ًو مُصلیِّا ً

سائلہ کی عادت اگرچہ تبدیل ہوچکی ہو تب بھی ان کی عدت تین ماہواریوں کے گذرنے کے بعد ختم ہوگی،چنانچہ جس دن طلاق ہوئی ہے،اس کے بعد سائلہ تین ماہواریاں مکمل کرے گی تو سائلہ کی عدت مکمل ہوجائے گی۔

مأخَذُ الفَتوی

کما فی الفتاوی الھندیة: کما إذا طلق الرجل امرأته طلاقا بائنا أو رجعيا أو ثلاثا أو وقعت الفرقة بينهما بغير طلاق وهي حرة ممن تحيض فعدتها ثلاثة أقراء سواء كانت الحرة مسلمة أو كتابية كذا في السراج الوهاج اھ (1/526)۔