انٹرنیٹ پر موجود مختلف ایپس میں انویسٹمنٹ کرکے منافع لینا

میں ایک کمپنی کے ساتھ کام کررہا ہوں،جس کانام Paicoo ہے،میں نے 100 ڈالر کی سرمایہ کاری کی ہے،ایک مہینے کے بعد میں نے اپنا 100 ڈالر نکال لیا ہے،کمپنی نے مجھے 100 ڈالر اضافی دیے ہیں ،اب میں اضافی ڈالر پرکام کرہا ہوں، کمپنی مجھے صرف اس لیے ادائیگی کررہی ہےکہ میں کمپنی کے لیے کام کرہا ہوں،روزانہ کی بنیاد پر 20 آرڈرز آتے ہیں اور کمپنی مجھے دو سے چھ(6) ڈالر ہر دن ادا کرتی ہے،کیا یہ حلال ہے یا حرام؟

الجوابُ حامِدا ًو مُصلیِّا ً

آجکل مختلف ناموں سے اس طرح کی مختلف اپلیکیشن موجود ہیں جس میں لوگوں سےانویسٹمنٹ کے نام پر سرمایہ وصول کیا جاتا ہےاور روزانہ یا ما ہانہ کی بنیاد پر پرکشش منافع کا لالچ دے کر اچھے خاصے لوگ ان کے جال میں پھنس جاتے ہیں،حالانکہ عملاً اس رقم کے ذریعے کوئی کاروبار نہیں کیا جاتا،بلکہ لوگوں کومطمئن کرنے کے لیے یا تو انہیں کچھ اشتہارات (جو جائز اور ناجائز امور پر مشتمل ہوتے ہیں) دیے جاتے ہیں جس پر کلک کرکے انہیں اس کی اجرت دی جاتی ہے یا پھر مختلف آن لائن اسٹور کے مختلف پراڈکٹ کی تصاویر دیکر جعلی طریقہ کار کے ذریعہ ان کی ریٹنگ بڑھانے کی خاطر اپنے آپ کو جھوٹا خریدار ظاہر کیا جاتاہے ،حالانکہ درحقیقت ان اشیاء کی خرید وفروخت مقصود نہیں ہوتی،لہذا یہ پورا طرزِ عمل دھوکہ دہی اورجھوٹ پرمبنی فعل ہونے کےساتھ جمع کردہ رقم کے ضائع ہونے کا سبب بھی ہے،اس لیے اس طرح کی آن لائن ایپلیکیشن کے ذریعے رقم جمع کرانا اور اس پر پرافٹ کے نام سے رقم حاصل کرنا بہر دوامور شرعاً جائز نہیں جس سے اجتناب لازم ہے۔

مأخَذُ الفَتوی

کمافی صحيح البخاري: عن أبي هريرة، عن النبي صلى الله عليه وسلم قال: " آية المنافق ثلاث: إذا حدث كذب، وإذا وعد أخلف، وإذا اؤتمن خان "اھ(ج1 ص16 باب علامۃ المنافق ط: بیروت)۔
وفی مسند أحمد: حدثنا وكيع قال: سمعت الأعمش قال: حدثت عن أبي أمامة قال: قال رسول الله صلى الله عليه وسلم: " يطبع المؤمن على الخلال كلها إلا الخيانة والكذب "اھ(ج36 ص504 حدیث ابی امامۃ الباھلی ط: مؤسسۃ الرسالۃ)۔