ایڈ دیکھ کر پیسے کما نا جائز ہے؟

السلام علیکم ورحمۃ اللہ وبرکاتہ!
سوال یہ ہے کہ ایک ایپ ایسی ہے کہ جس کے اندر پہلا ڈپوزٹ کرنا پڑتا ہے،وہ ڈیپوزٹ کے حساب سے اس کو ایک مہینے کا نفع دیا جاتا ہے، مثال کے طور پر اگر آپ 500 روپے ایک دفعہ ڈیپوزٹ کرتے ہو تو وہ ایک مہینے کے لیے ہو گیا ،اب آپ روزانہ کا ایک ایڈ آپ نے دیکھنا ہے جس سے آپ کو 50 روپے روزانہ کے ملیں گے، جس دن ایڈ دیکھو گے اس دن ملیں گے جس دن نہیں دیکھے گا، تو نہیں ملیں گے، تو کیا یہ جائز ہے یا نہیں؟ اور ایسی ایپ یہ ارننگ ایپ جو جائز ہو اگر ان کے نام بتا دیں ۔تو جزاک اللہ !شکریہ !

الجوابُ حامِدا ًو مُصلیِّا ً

مروجہ اپلیکیشن پر اشتہارات دیکھنے کا عمل فقہی اعتبار سے عقد اجارہ کے اصولوں پر پورا نہیں اترتا، بلکہ اس میں درج زیل کئی خرابیاں پائی جاتی ہیں :
(1)اشتہارات اور ویڈیوز دیکھنا کوئی ایسا قابل منفعت عمل نہیں جسے اجارہ کا معقود علیہ قرار دیا جا سکے، اور اسے دیکھنے والے ممبر کو اس پر اجرت کا مستحق ٹھہرایا جا سکے ۔
(2)بہت سے اشتہارات غیر شرعی امور پر بھی مشتمل ہوتے ہیں ۔
(3)مصنوعی طریقہ سے ویو رز کی تعداد بڑھا کر دکھایا جاتا ہے جو کہ دھوکہ دہی کے زمرے میں آتا ہے۔
(4) اکثر کمپنیاں اپنا دائرہ کار وسیع کرنے کے لیے دیگر لوگوں کو شامل کرنے کے لیے (MLM) ملٹی لیول مارکیٹنگ کا طریقہ کار اختیار کرتی ہے اور لوگ زیادہ نفع کے حصول کے لیے دوسرے لوگوں کو بھی اس کام میں شامل ہونے کی دعوت دیتے ہیں جس کا طریقہ کار شرعی ضابطوں کے مطابق نہیں، لہذا ان خرابیوں کی وجہ سے مروجہ ایپلیکیشن کے ذریعہ اشتہارات اور ویڈیوز دیکھنے کو ذریعہ معاش بنانا جائز نہیں اس سے احتراز لازم ہے۔