نو مسلموں کے ساتھ عدالتوں کے نامناسب رویے کا حکم

جناب مفتی نعیم صاحب دار الافتاء جامعہ بنوریہ عالمیہ کراچی !
جنابِ عالی!گزارش ہے کہ پوری دنیا میں ہزاروں کی تعداد میں خواتین و حضرات دائرۂ اسلام میں داخل ہو رہے ہیں ،لیکن کوئی بھی نا خوشگوار واقعات پیش نہیں آ رہے، اس کے بر خلاف پاکستان میں آئے روز مسلمان بہنوں کے خلاف ہنگامہ آرائی کی جاتی ہے، آپ سے یہ معلوم کرنا ہے کہ اگر کوئی لڑکی مسلمان ہو کر کسی مسلمان مرد سے شادی کرے، تو ایک طوفان بر پا کیا جاتا ہے، جبکہ مسلمان ہونے والی لڑکی واضح کر دیتی ہے کہ میں کلمۂ توحید پڑھ کر مسلمان ہو چکی ہوں ،اور اپنی مرضی سے اپنے شوہر کے ساتھ زندگی گزارنا چاہتی ہوں، لیکن ہماری عدالتیں ایسی لڑکی کو گرفتار کر کے دارالامان میں بند کر دیتی ہیں،اور اتنا پریشان کرتی ہیں تاکہ کوئی مسلمان نہ ہو سکے ۔
جنابِ عالی! آپ سے دریافت یہ کرنا ہے کہ از روئے شریعت ہماری حکومت اور عدالت کو کیا کرنا چاہئیے ؟ امید ہے کہ قرآن و حدیث کی روشنی میں آگاہ فرمائیں گے؟

الجوابُ حامِدا ًو مُصلیِّا ً

دنیا کے کسی بھی خطے میں کسی مرد یا عورت کا دائرۂ اسلام میں داخل ہونا بہت بڑی نیکی اور اسلام کی حقانیت کی دلیل اور تمام مسلمانوں کے لئے باعثِ فخر ہے، اس لئے تمام دنیا کے مسلمانوں کو عموماً اور مسلم ممالک کے مسلمانوں کو خصوصاً اس عمل کی تحسین اور اس قسم کے لوگوں کی حوصلہ افزائی کرنی چاہیئے، ملکِ خداداد پاکستان کی جو صورتِ حال سائل نے اپنے بیان میں درج کی ہے کہ یہاں مسلمان ہونے والوں کو ہراساں کر کے ان کی حوصلہ شکنی کی جاتی ہے، اگر یہ درست اور حقیقت پر مبنی ہو جیسا کہ اخبارات سے بھی واضح ہو رہا ہے، تو یہ انتہائی افسوس ناک اور اسلام بیزاری کی بدترین مثال ہونے کے علاوہ بہت بڑا گناہ اور ملکِ خدا داد پاکستان کے لئے بد نما داغ بھی ہے، لہذا حکومتِ پاکستان اور عدالتِ عالیہ کےذمہ داران کو چاہیئے کہ جو لوگ اس ملک کو بدنام کرنے والے اس قسم کی قبیح حرکت اور گناہِ کبیرہ کے مرتکب ہوں ،ان کے خلاف از خود کاروائی کریں، اور ایسے عناصر کو سخت ترین سزا سنائیں تاکہ دوسرے لوگ بھی اس سے عبرت حاصل کریں اور دنیا میں پاکستان کی بھی بدنامی نہ ہو۔