بائنانس اور کرپٹو کرنسی میں پیسے کمانا

کیا Binance اور cryptocurrency کے ذریعے سے پیسے کمانا جائز ہے ؟.جیسے ایک ویب سائٹ ہے cloud node اس میں اپنے پیسےاپنی مرضی سے (10 ڈالر /20 ڈالر یا زیادہ ) لگاتے ہیں،اور بیس دن میں پیسہ پر منافع ملتا ہے ، اور مجھے اس کے بارے میں علم نہیں ۔

الجوابُ حامِدا ًو مُصلیِّا ً

واضح ہو کہ بائنانس مختلف کرنسیوں کے تبادلہ کے لئے استعمال ہونے والا ایک پلیٹ فارم ہے ، جس پر بٹ کوائن سمیت کئی ورچول کرنسیوں کی خرید و فروخت کی جاتی ہے ، جبکہ موجودہ ورچو ل کرنسیوں کی شرعی حیثیت اب تک غیر واضح اور غیر اطمینان بخش ہے، بلکہ اسے محض ڈیوائس میں موجود ہونے کی حد تک ہی کرنسی خیال کیا جاتا ہے ، اور خارج میں اس کا کوئی حسی وجود نہیں، نیز پاکستان سمیت کئی ممالک میں قانونی طور پر ان کو مبادلہ اور خرید و فروخت کے لئے استعمال کرنے کی اجازت بھی فی الحال نہیں دی گئی ، لہٰذا اب تک کی معلومات کے مطابق ان پلیٹ فارمز کے ذریعے کسی بھی ورچول کرنسی کی خرید و فروخت اور کاروبار کرنے اور اس سے حاصل شدہ نفع کو اپنے استعمال میں لانے سے احتیاط لازم ہے ۔

مأخَذُ الفَتوی

کما فی بدائع الصنائع: وأما الذي يرجع إلى المعقود عليه فأنواع (منها): أن يكون موجودا فلا ينعقد بيع المعدوم، وماله خطر العدم كبيع نتاج النتاج بأن قال: بعت ولد ولد هذه الناقة وكذا بيع الحمل؛ لأنه إن باع الولد فهو بيع المعدوم، وإن باع الحمل فله خطر المعدوم الخ (فصل في الشرط الذي يرجع إلى المعقود عليه ج:5، ص: 138،ناشر: دار الکتب العلمیۃ)۔
وفی الھندیۃ: ومنها في المبيع وهو أن يكون موجودا فلا ينعقد بيع المعدوم وما له خطر العدم كبيع نتاج النتاج والحمل كذا في البدائع إلخ(کتاب البیوع، الباب الأول فی تعریف البیع إلخ، ج: 3، ص: 2، ط: ماجدیۃ)۔