کیا اللہ تعالیٰ جھوٹ بول سکتے ہیں؟

السلام علیکم! جناب والا! میرا سوال یہ ہے کہ میرے ایک دوست کا کہنا ہے کہ اللہ جل جلالہٗ جھوٹ بول سکتا ہے جس کے بارے میں وہ قرآن کی آیت ’’اللہ ہر چیز پر قادر ہے‘‘ سناتا ہے، میں آپ سے پوچھنا چاہتا ہوں کہ اس کا یہ کہنا اور یقین کرنا ٹھیک ہے یا اس نے کفریہ جملہ کہا؟ براہ مہربانی رہنمائی فرمائیں،تاکہ میں اس کو سمجھاسکوں۔ جزاک اللہ!

الجوابُ حامِدا ًو مُصلیِّا ً

اللہ تعالیٰ اپنی عمومِ قدرت کی وجہ سے ہر چیز پر قادر ہے لیکن اسی کے ساتھ اللہ تعالیٰ نے بعض کاموں کے نہ کرنے کا وعدہ بھی فرمایا ہے، لہٰذا حسبِ وعدہ کسی کام کے نہ کرنے سے یہ لازم نہیں آتا کہ اللہ تعالیٰ اس چیز پر قادر نہیں ہیں، مثلاً: اللہ تعالیٰ مشرک کی مغفرت پر قادر ہے، لیکن ساتھ ساتھ یہ وعدہ بھی فرمایا ہے کہ بلا توبہ مشرک کی بخشش نہیں فرمائیں گے، لہٰذا عدمِ مغفرت سے عدمِ قدرت لازم نہیں آتی، اسی طرح یہ بھی سمجھ لیجیے کہ ’’اللہ تعالیٰ‘‘ اعلیٰ و برتر ذات ہے اور تمام عیوب اور نقائص سے منزہ اور پاک ہے لہٰذا کوئی ایسا امر جو عیبا نقص پر مشتمل ہو اللہ تعالیٰ سے صادر نہیں ہوسکتا، لیکن اس وجہ سے نہیں کہ اللہ تعالیٰ کی قدرت سے یہ خارج ہے، بلکہ اس وجہ سے کہ اللہ تعالیٰ تمام عیوب اور نقائص سے پاک اور منزہ ہے اور اس قسم کے امور کے ارتکاب نہ کرنے کا وعدہ بھی ہوا ہے، مختصر الفاظ میں یوں سمجھ لیجیے کہ اللہ تعالیٰ سے کذب وغیرہ نقائص کا صدور ممکن ہے لذاتہ جبکہ ممتنع ہے لغیرہ، اس لیے بجائے دوست کو سمجھانے کی خود سمجھنے کی ضرورت ہے۔

مأخَذُ الفَتوی

في شرح العقائد النسفية: ولا یخرج عن علمه وقدرته شیئ لأن جهل بالبعض والعجز عن البعض نقص اھ (ص: ۳۶) (ص:۳۶)۔
ففی شرح العقائد النسفية: ولا یخرج عن علمه وقدرته شیئ لأن جهل بالبعض والعجز عن البعض نقص اھ (ص: ۳۶) واللہ أعلم!