رشتہ کیلئے دعاء خیر کرنےسے نکاح نہیں ہوتا

السلام علیکم !مجھے ایک مسئلہ کے متعلق معلومات حاصل کرنی ہے ایک رسم کے متعلق معلومات حاصل کرنی ہے، دعا خیر جسے کہتے ہیں ،لڑکے اور لڑکی سے انکی رضامندی دریافت کرنے کے بعد دونوں خاندان کو ایک دعوت دی جاتی ہے جسمیں تمام لوگوں کو بتایا جاتا ہے کے لڑکی اور لڑکے کی رضامندی سے ان دونوں کا رشتہ طےپایا ہے، اور پھر ان کی زندگی کے لیے دعا کی جاتی ہے، کیا اس میں نکاح کے فرائض پورے ہو جاتے ہیں ؟کیایہ نکاح قرار پاتا ہے؟کیونکہ لڑکی کا ولی موجود ہوتا ہے، دونوں کی رضامندی کے گواہ بھی جمع ہو جاتے ہیں اور دعا بھی ہو جاتی ہے۔

الجوابُ حامِدا ًو مُصلیِّا ً

واضح ہو کہ نکاح منعقد ہونے کیلئے لڑکا ،لڑکی یا ان کی طرف سے متعین کردہ وکیلوں کاباقاعدہ طور پر دو گواہوں کی موجودگی میں ایجاب وقبول کرنا ضروری ہے،لہذاسوال میں مذکور دعوتی مجلس میں اگرباقاعدہ لڑکا ،لڑکی یا ان کے مقرر کردہ وکیلوں کی طرف سے شرعی گواہوں کی موجود گی میں ایجاب وقبول نہ کیا جاتا ہو تو محض دعا کی رسم کو نکاح قرار نہیں دیا جاسکتا ،بلکہ اس کی حیثیت محض ایک وعدہ کی ہوگی،اور اس رسم کےبعد بھی مذکور لڑکا لڑکی ایک دوسرے کیلئےحسب سابق اجنبی رہیں گے۔

مأخَذُ الفَتوی

کما فی الدر المختار: (وينعقد) متلبسا (بإيجاب) من أحدهما (وقبول) من الآخر (وضعا للمضي) لأن الماضي أدل على التحقيق (كزوجت) نفسي أو بنتي أو موكلتي منك الخ(ج3 ص9 ط:دار الفکر)۔
وفی بدائع الصنائع: وأما ركن النكاح فهو الإيجاب والقبول وذلك بألفاظ مخصوصة، أو ما يقوم مقام اللفظ، فيقع الكلام في هذا الفصل في أربعة مواضع أحدها: في بيان اللفظ الذي ينعقد النكاح به بحروفه الخ(ج2 ص229 ط:دار الکتب العلمیۃ)۔
وفی الھندیۃ: (ومنها) سماع الشاهدين كلامهما معا هكذا في فتح القدير فلا ينعقد بشهادة نائمين إذا لم يسمعا كلام العاقدين، كذا في فتاوى قاضي خان وتكلموا في الأصمين اللذين لا يسمعان والصحيح أنه لا ينعقد الخ(ج1 ص228 ط:دار الفکر)۔
وفی الدر المختار: وكذا أنا متزوجك أو جئتك خاطبا لعدم جريان المساومة في النكاح أو هل أعطيتنيها إن المجلس للنكاح، وإن للوعد فوعد؛ ولو قال لها يا عروسي فقالت لبيك انعقد على المذهب (فلا ينعقد) بقبول بالفعل كقبض مهر ولا بتعاط ولا بكتابة حاضر بل غائب بشرط إعلام الشهود بما في الكتاب ما لم يكن بلفظ الأمر فيتولى الطرفين فتح الخ(ج3 ص12 کتاب:النکاح، ط:دار الفکر)۔