شادی کیلئے استخارہ کروانے کا حکم

السلام علیکم! نام: ۔۔۔۔۔، ماں کا نام: ۔۔۔۔، نام: ۔۔۔۔، ماں کا نام شاہدہ۔ جناب آپ ذرا چیک کر کے بتائیں کہ میرا اس سے شادی کرنا ٹھیک رہیگا یا نہیں؟لڑکی کے گھر والے راضی ہونگے یا نہیں؟
برائے مہربانی آپ میرا استخارہ دیکھ لیں، تاکہ میں کوئی بہتر فیصلہ کر سکوں، آپ کی بہت مہربانی ہوگی۔ جزاك الله خیراً !

الجوابُ حامِدا ًو مُصلیِّا ً

استخارہ کرنے سے یہ تو معلوم نہیں ہوتا کہ لڑکی کے گھر والے راضی ہوں گے یا نہیں، البتہ بہتر اور غیر بہتر کا اشارہ ملتا ہے۔
جبکہ مسنون یہ ہے کہ استخارہ خود کیا جائے اور استخارہ کا طریقہ یہ ہے کہ سونے سے قبل دو رکعت نفل استخارہ کی نیت سے پڑھے اور نماز کے بعد یہ دعا پڑھے:-
”اللهمَّ إنِّي أَسْتَخِيْرُكَ بعِلْمِكَ، وأسْتَقْدِرُكَ بِقُدْرَتِكَ، وَأَسْألُكَ مِنْ فَضْلِكَ الْعَظِيْمِ، فَإِنَّكَ تَقْدِرُ وَلَا أَقْدِرُ، وَتَعْلَمُ وَلَا أَعْلَمُ، وَأَنْتَ عَلَّامُ الْغُيُوْبِ، اللهمَّ إنْ كُنْتَ تَعْلَمُ أنَّ هٰذَا الْأَمْرَ خَيْرٌ لَيْ فِي دِيْنِيْ، وَمَعَاشِيْ، وَعَاقِبَةِ أَمْرِيْ وَعَاجِلِه، فَاقْدُرْهُ لِیْ، وَيَسِّرْهُ لِیْ، ثُمَّ بَارِكْ لِي فِيْه، وَإنْ كُنْتَ تَعْلَمُ أنَّ هٰذَا الْأَمْرَ شَرٌّ لِي فِي دِيْنِيْ وَمَعَاشِيْ، وَعَاقِبَةِ أَمْرِيْ، واٰجِلِه، فَاصْرِفْهُ عَنِّي، وَاصْرِفْنِي عَنْهُ،وَاقْدِرْ لِيَ الْخَيْرَ حَيْثُ كَانَ، ثُمَّ أَرْضِنِي بِه.“
اور جب ”هٰذَا الْأَمْرَ “ پر پہنچے( جس لفظ پر لکیر بنی ہے) تو اس کے پڑھتے وقت اسی کام کا دھیان(خیال) کرلے جس کے لئے استخارہ کرنا مقصود ہے، اس کے بعد پاک وصاف بچھونے پر قبلہ کی طرف منہ کر کے با وضو سو جائے،جب سو کر اٹھے اس وقت جو بات دل میں مضبوطی سے آوے، وہی بہتر ہے، اسی کو کرنا چاہیے، کہ یہی استخارہ ہے۔
اور اگر اس کام سے دل اچاٹ ہو جائے تو اسے چھوڑ دے اور اگر استخارہ کے بعد بھی شک رہے تو پھر دوسری رات کو کر لے غرض تردد اور شک کی صورت میں سات روز تک کیا جا سکتا ہے، جبکہ اطمینانِ قلب یا بالکل دل اُچاٹ ہو جانے کی صورت میں دوسری دفعہ استخارہ کرنے کی ضرورت نہیں، بلکہ دل میں پختہ آنے والی رائے کے موافقِ عمل کرے۔