انٹرنیٹ سے کورس فری ڈاون لوڈکرنا

السلام علیکم! میں نے ایک ویب سائٹ سے کورس ڈاؤن لوڈ کیا ہے، اسکی فیس ادا کی جاتی ہے، لیکن میں نے اسے "ٹورینٹ" سے فری میں کیا ہے، کیا میں اس سے ابھی سیکھ سکتا ہوں؟ جب میرے پاس پیسے آجائیں تو میں وہ خرید لوں گا، اسکی قیمت 4$ہے ، جو کہ پاکستانی تقریباً 2500 روپےبنتی ہے، میں کام سیکھنا چاہتا ہوں اور وہ کورس کافی اچھا ہے، اس لئے میں سوچ رہا ہوں کہ ابھی اس سے سیکھ لوں ، جب پیسے آجائیں گے تو میں جلد سے جلد اسے خرید لوں گا۔

الجوابُ حامِدا ًو مُصلیِّا ً

سائل کا سوال پوری طرح واضح نہیں،تاہم اگر کسی ادارے نے اپنی ویب سائٹ پر کوئی کورس اپلوڈ کیا ہو، جسکی ادارے کی طرف سے فیس مقرر ہو اور بغیر فیس کے اس کورس کو حاصل کرنے اور سیکھنے کی اجازت نہ ہو تو سائل کیلئے کسی طرح ویب سائٹ سے وہ کورس ڈاؤن لوڈ کرنا دھوکہ دہی اور جعلسازی پر مبنی عمل ہے، جس سے سائل کو اجتناب کرنا چاہیئے تھا، البتہ اب جب سائل نے وہ کورس ڈاؤن لوڈ کر ہی لیا ہے تو ان ویڈیوز وغیرہ سے کورس سیکھنے کی گنجائش ہے،تاہم سائل کے ذمہ مذکور ویب سائٹ والوں کو ان کی مقررہ فیس کی ادائیگی لازم اور ضروری ہوگی۔

مأخَذُ الفَتوی

کما فی مرقاة المفاتيح :( لا يحل مال امرئ ) أي : مسلم أو ذمي ( إلا بطيب نفس ) أي : بأمر أو رضا منه . رواه البيهقي في شعب الإيمان ، و الدارقطني في المجتبى . (5/1974)۔
کما فی درر الحكام في شرح مجلة الأحكام :( المادة ٩٦)لا يجوز لأحد أن يتصرف في ملك الغير بلا إذنه هذه المادة مأخوذة من المسألة الفقهية ( لا يجوز لأحد التصرف في مال غيره بلا إذنه و لا ولايته ) الواردة في الدر المختاراھ (1/96)۔
و فیہ ایضاً :( المادة ٩٧ ) : لا يجوز لأحد أن يأخذ مال أحد بلا سبب شرعي هذه القاعدة مأخوذة من المجامع و قد ورد في الحديث الشريف « لا يحل لأحد أن يأخذ متاع أخيه لاعبا و لا جادا فإن أخذه فليرده »(الی قولہ ) ( بلا سبب شرعي ) لأنه بالأسباب الشرعية كالبيع ، و الإجارة ، و الهبة ، و الكفالة ، و الحوالة يحق أخذ مال الغير ، فلو باع إنسان مالا بخمسين قرشا فللمشتري بمقتضى المادة ٣٦٩ أخذ ذلك المال كما للبائع أيضا أخذ الخمسين قرشا .(1/98)۔