آنلائن ایپلیکیشنز کے ذریعہ آمدن حاصل کرنا

اسلام علیکم
محترم ایک ایپ ہے جس میں لوگ ڈالرمیں انوسمینٹ کرتے ہے اور وہ آپ کو 100 ڈالر انوسٹ کر کے آپ کو 3 سے 4 ڈالر ڈیلی کے دیتے ہے جتنا آپ انوسٹ کرتے ہے آس حساب سے ڈالر دیتے ہے۔اس میں کام یہ ہوتا ہے ڈیلی آپ کو 50 آڈر شرٹ بنین وغیرہ کی تصویر ہوتے ہے اس پر کلک کر کے آپ اسے بیجتے ہو اور آپ کو ڈیلی کی ڈالر مل جاتے ہو جب تک آڈر آپ نہیں کرتے تو آپ کو کچھ نہیں ملتا۔برائے مہربانی شرعی اصولوں کے مطابق اس انوسمنٹ کی کیا حیثیت ہے رہنمائی فرمائیں

الجوابُ حامِدا ًو مُصلیِّا ً

آج کل گوگل پلے اسٹور پر مختلف ناموں سے اس طرح اپلیکیشن موجود ہیں جس میں لوگوں سے انویسمنٹ کے نام پر سرمایہ وصول کیا جاتا ہے اور روزانہ یا ماہانہ بنیاد پر پر کشش منافع کا لالچ دے کر اچھے خاصے لوگ ان کے جال میں پھنس جاتے ہیں،حالانکہ عملاً اس رقم کے ذریعہ کوئی کاروبار نہیں کیا جاتا، بلکہ لوگوں کو مطمئن کرنے کے لئے یا تو انہیں کچھ اشتہارات (جو جائز اور ناجائز امور پر مشتمل ہوتے ہیں) دئیے جاتے ہیں،جس پر کلک کر کے انہیں اس کی اجرت دی جاتی ہے یا پھر مختلف آئن لائن اسٹور کے مختلف پروڈکٹ کی تصاویر دے کر جعلی طریقہ کار کے ذریعہ ان کی ریٹنگ بڑھانے کی خاطر اپنے آپ کو جھوٹا خریدار ظاہر کیا جاتا ہے حالانکہ در حقیقت ان اشیاء کی خرید و فروخت مقصود نہیں ہوتی،لہذا یہ پورا طرز عمل دھوکہ دہی اور جھوٹ پر مبنی فعل ہونے کے ساتھ جمع کردہ رقم کے ضائع ہونے کا سبب بھی ہے،اس لئے اس طرح کی آن لائن اپلیکیشن کے ذریعہ رقم جمع کرانا اور اس پر پرافٹ کے نام سے رقم حاصل کرنا بہر دو امور شرعاً جائز نہیں،اس سے اجتناب لازم ہے۔

مأخَذُ الفَتوی

کما فی مسند الامام احمد بن حنبل:حدثنا وكيع قال: سمعت الأعمش قال: حدثت عن أبي أمامة قال: قال رسول الله صلى الله عليه وسلم: يطبع المؤمن على الخلال كلها إلا الخيانة والكذب(36/504،رقم الحدیث:22170)
وفی الصحیح البخاری:"حدثنا سفيان، عن الأعمش، عن عبد الله بن مرة، عن مسروق، عن عبد الله بن عمرو أن النبي صلى الله عليه وسلم قال: " أربع من كن فيه كان منافقا خالصا، ومن كانت فيه خصلة منهن كانت فيه خصلة من النفاق حتى يدعها: إذا اؤتمن خان، وإذا حدث كذب، وإذا عاهد غدر، وإذا خاصم فجر. تابعه شعبة، عن الأعمش."(1/16،رقم الحدیث:34)۔واللہ اعلم بالصواب