کیا شوہر مرنےکے بعد قبر میں بیوی کا استقبال کرتاہے

السلام علیکم ورحمتہ اللہ وبرکاتہ! کیا فرماتے ہیں علمائے دین، بیچ اس مسئلہ کے بارے میں کہ زید کہتا ہے میری والدہ کا جنازہ فلاں شخص نے پڑھایا،تو قبر میں پہنچنے پر میرے والد صاحب نے ان کا استقبال کیا (جو خود کئی سال پہلے وفات پا چکے) اور ان کی (یعنی میری والدہ) کی انگلی پکڑ کر جنت میں لے گئے، پوچھنا یہ ہے کہ کیا ہر خاوند جنت میں جاتاہے، اور یہ اختیار حاصل ہوتا ہے کہ وہ اپنی دنیاوی بیوی کی قبر میں اس کے استقبال کے لیے تشریف لائے، اور اپنی دنیاوی بیوی کو انگلی سے پکڑ کر جنت میں لے جائے، زید کو اپنے والد کی بخشش کا علم کیسے ہوا، کیا ایسا ممکن ہے؟ شریعت کی روشنی میں رہنمائی فرمائیں، زید زندہ ہے، اس نے وحی کا دعویٰ نہیں کیا اور نہ یہ دعویٰ کیاہے کہ اسے اپنے والدین کی برزخی زندگی کا علم خواب کے ذریعے ہوا، زید کے بارے میں شریعت اسلامی کیا حکم جاری کرتی ہے؟ شریعت کے مطابق رہنمائی فرمائیں۔ عین نوازش ہوگی، والسلام دعاگو احقر العباد۔

الجوابُ حامِدا ًو مُصلیِّا ً

واضح ہوکہ قبر وآخرت سے متعلق تمام تر امور کا تعلق علم غیب سے ہے ، جو اللہ رب العزت کے علاوہ کسی کے پاس نہیں ہے، لہذا اس سے متعلق قرآن وسنت میں جس حد تک تذکرہ ملتا ہے، اسی حدتک اس پر ایمان لانا لازم ہے،اس سے زائد امور پر قیاس آرائیاں کرنا اور اندازے لگانا گمراہی کا سبب ہے،اسلئے زید کا مذکور غیبی امور سے متعلق اتنا بڑا دعوٰی کرنا اور پھر لوگوں میں اسکی تشہیر کرنا قطعاً غلط اور لوگوں میں تشویش اور غلط فہمیاں پیدا کرنے کا باعث ہے،اس لئے انہیں آئندہ کے لئے اس طرح کے امورسے اجتناب کرنا چاہیئے، اور لوگوں کو بھی چاہیئے کہ اس کی غیر شرعی پیشنگوئیوں اور دعؤوں پر یقین کرنے اور دوسرے لوگوں میں اس کی تشہیر کرنے سے اجتناب کریں۔