پاکستان مرکنٹائل ایکسچینج کے ذریعہ کاربار کا حکم

السلام علیکم ورحمۃ اللہ وبرکاتہ!
حضرت مفتی صاحب میرا سوال یہ ہے کہ میں نے کسی دوست کے کہنے پر پی ایم ای ایکس PMEX یعنی پاکستان مرکنٹائل ایکسچینج میں آن لائن اکاؤنٹ کھلوایا ہے جس کے ذریعے میں اپنے اکاؤنٹ میں لاکھوں روپے رکھ کر آن لائن چیزیں گولڈ سلور یا پٹرول وغیرہ کی خرید و فروخت کر سکتا ہوں. ابھی تک میں نے کوئی چیز خرید و فروخت نہیں کی ہے، کیا ایسے کاروبار کی اسلام میں اجازت ہے؟ اور کیا اسکی آمدنی مشکوک تو نہیں ہے یا حلال حرام تو نہیں ہے؟

الجوابُ حامِدا ًو مُصلیِّا ً

واضح ہو کہ PMXL(پاکستان مرکنٹائل ایکسچینج) میں بھی فاریکس ٹریڈنگ کی طرح عام طور پر خرید وفروخت مقصود نہیں ہوتی ، بلکہ فرق برابر کر کے نفع کمانا مقصود ہوتا ہے ، اسی وجہ سے اس کا روبار میں قبضہ کے بغیر ہی وہ چیز آگے بیچ دی جاتی ہے،جوکہ شرعاً جائز نہیں ، لہذا سائل کے لئے عام حالات میں تو یہ کاروباردرست نہیں ، جس سے احتراز لازم ہے ، تا ہم اگرسائل اپنے کسی وکیل کے ذریعے حلال اشیاء خریدنے کے بعد ان پر قبضہ کر کے پھرآگے بیچے تو بلا شبہ اس کا نفع بھی حلال ہوگا ، مگر چونکہ اس کاروبارمیں عموماً ایسا نہیں ہوتا ، اس لئے اس سے احتراز لازم ہے ۔

مأخَذُ الفَتوی

کمافی الھندیۃ:
«وأما شرائط الصحة فعامة وخاصة فالعامة لكل بيع ما هو شرط الانعقاد لأن ما لا ينعقد لم يصح ولا ينعكس فإن الفاسد عندنا منعقد نافذ إذا اتصل به القبض»(الی قولہ)«ومنها القبض في بيع المشترى المنقول وفي الدين فبيع الدين قبل قبضه فاسد كالمسلم فيه ورأس المال ولو بعد الإقالة وبيع شيء بالدين الذي على فلان بخلاف ما إذا كان على البائع ومنها المماثلة بين البدلين في أموال الربا ومنها الخلو عن شبهة الربا ومنها القبض في الصرف قبل الافتراق»(ج:3/ص:3،ط:المطبعۃ الکبریٰ الامیریۃ ببولاق مصر)