کیا مجبوری کی حالت میں سید شخص کے علاج معالجہ کے لئے زکوۃ کی رقم لی جاسکتی ہے ؟

السلام علیکم ورحمۃ اللہ وبرکاتہ! قریشی شخص جو حضرت علی رضی اللہ کی اولا دمیں زین العابدین سے ہیں ، اور وہ ایک بیماری میں مبتلی ہیں ، وہ اپنے علاج نہیں کرسکتا ، سرکاری ہسپتال میں ٹیسٹ کی سہولت نہیں ، پرائیوٹ آغاخان میں ٹیسٹ کیا ، وہاں زکاۃ کی مد میں (26000) ہزار کا ٹیسٹ (5000) ہزار میں کیا ، لیکن وہاں فارم میں لکھا تھا کہ میں سید نہیں ہوں یہ دستخط کرایا ، بندہ زکاۃ کا مستحق ہے، لیکن اہل بیت میں ہونے کی وجہ سے زکوۃ نہیں لے سکتا ، براہ مہربانی بتائیں آغا خان سے کینسر کا علاج کرنا ہے ، لیکن وہاں بھی سید خاندان کا علاج نہیں کرتے ، کیونکہ سید یا قریشی زکوۃ کےمستحق نہیں ، ابھی اس صورت حال میں ایک اہل بیت کیا کرے؟ جزاک اللہ خیراً۔

الجوابُ حامِدا ًو مُصلیِّا ً

واضح ہو کہ سید کو زکوٰۃ دینا شرعاً جائز نہیں ، بلکہ اگر کوئی سید واقعۃً ضرورت مند یا بیمار ہو تو صاحب حیثیت مالداروں پر لازم ہے کہ وہ اس کی مدد کریں اور اس کو مصیبت اور تکلیف سے نجات دلائیں، یہ بہت بڑے اجر وثواب کا کام ہے، اور آپ ﷺ کے ساتھ محبت کی دلیل بھی ہے، اور اس کے لئے بہتر تو یہ ہے کہ وہ زکوٰۃاور صدقات واجبہ کے علاوہ نفلی صدقہ سے اس کی مدد کریں، تاہم اگر نفلی صدقات علاج معالجہ وغیرہ کے لئے ناکافی ہوں تو بمجبوری زکوٰۃ کی رقم بھی باقاعدہ تملیک کرنے کے بعد اس کے علاج معالجہ میں لگائی جاسکتی ہے، لہذا صورت مسئولہ میں بھی مذکور سید کے علاج معالجہ کے لئے صاحب حیثیت افراد کو چاہئے کہ وہ نفلی صدقات وغیرہ کے ذریعے اس کی مدد کریں، اور بمجبوری زکوٰۃ کی رقم بھی تملیک کے بعد اس کے علاج معالجہ میں لگائی جاسکتی ہے۔

مأخَذُ الفَتوی

کما فی صحیح مسلم: قال رسول اللہﷺ إِنَّ هَذِهِ الصَّدَقَاتِ إِنَّمَا هِيَ أَوْسَاخُ النَّاسِ، وَإِنَّهَا لَا تَحِلُّ لِمُحَمَّدٍ، وَلَا لِآلِ مُحَمَّدٍ»(ج2 ص 754 رقم 1072 باب ترک استعمال آل النبی)۔
وفی البحرالرائق: (قوله وبني هاشم ومواليهم) أي لا يجوز الدفع لهم لحديث البخاري «نحن - أهل بيت - لا تحل لنا الصدقة الخ ( ج2 265 باب المصرف ط ماجدیہ)۔
وفی الھندیۃ: ولا يدفع إلى بني هاشم، وهم آل علي وآل عباس وآل جعفر وآل عقيل وآل الحارث بن عبد المطلب كذا في الهداية ويجوز الدفع إلى من عداهم من بني هاشم كذرية أبي لهب؛ لأنهم لم يناصروا النبي - صلى الله عليه وسلم - كذا في السراج الوهاج.الخ ( ج1 ص 189 الباب السابع فی المصارفط ماجدیہ)۔