گوشت کے حلال ہونے سے متعلق غیر مسلم کی خبر کا حکم

میں چائنہ میں رہتا ہوں اور یہاں چائنہ میں جو گوشت ملتا ہے چاہے وہ مرغی والا ہو یا گائے والا وہ سلاٹر ہاؤس میں ذبح کیا جاتا ہے اور ہمیں نہیں پتہ ہوتا کہ یہ ذبیحہ حلال ہے یا نہیں ؟ ہمیں صرف اس وقت پتہ لگتا ہے جب ہم پیکج کے اوپر حلال کی اسٹیمپ دیکھتے ہیں اور یہاں فاسٹ فوڈ کی ایک دکان ہے اور اس دکان کا مالک غیر مسلم ہے اس دکان پر بہت سارے مسلمان جا کر مرغی والا برگر کھاتے ہیں اور وہ دکان والے خود بھی یہی کہتے ہیں کہ یہ مرغی والا برگر حلال ہے اور مرغی کے برگر کے علاوہ باقی جو برگر ہیں وہ حلال نہیں ہیں وہ صرف کہتے ہیں کہ مرغی والا برگر حلال ہے پر جب ان کو یہ کہا جاتا ہے کہ آپ ہمیں مہر والا بیگ دکھائیں جس میں یہ مرغی پیک ہو کر آتی ہے تو وہ کہتے ہیں کہ ہم نہیں دکھا سکتے تو اس صورت میں کیا وہ مرغی والا برگر کھانا جائز ہے یا ناجائز؟

الجوابُ حامِدا ًو مُصلیِّا ً

واضح ہو کہ کسی چیز کے حلال یا حرام ہونے کے متعلق خبر دینا چونکہ دیانات کی قبیل سے ہے، اور دیانات کے بات میں غیر مسلم کی خبر شرعاً معتبر نہیں ہوتی، لہذا چا ئنہ کے مذکور فاسٹ فوڈ کی دکان کے فقط غیر مسلم مالک کی جانب سے مرغی والے برگر کو حلال کہنے سے وہ برگر حلال شمار نہ ہوگا، اور نہ ہی کسی مسلم کیلئے اسے کھانا شرعاً درست ہوگا، البتہ اگر اس برگر میں استعمال ہونے والا گوشت کسی مستند مسلم ادارے کی طرف سے حلال سرٹیفائیڈ ہو، تو اس ادارے کی تصدیق کی بنیاد پر مسلمانوں کے لئے وہ گوشت اپنے استعمال میں لانا درست ہوگا ، ورنہ نہیں۔

مأخَذُ الفَتوی

کما قال اللہ تعالی: وَلَا تَأۡكُلُواْ مِمَّا لَمۡ يُذۡكَرِ ٱسۡمُ ٱللَّهِ عَلَيۡهِ وَإِنَّهُۥ لَفِسۡقٞ (الانعام،الایہ:121)۔
وفی الصحیح للبخاری: عن عامر قال: سمعت نعمان بن بشير يقول: سمعت رسول الله صلى الله عليه وسلم يقول: «الحلال بين والحرام بين، وبينهما مشبهات، لا يعلمها كثير من الناس الخ (باب فضل من استبرا لدینہ،ج1،ص20،رقم:52، ط: السطانیہ)۔
وفی الہندیہ: رجل اشترى من التاجر شيئا هل يلزمه السؤال أنه حلال أم حرام قالوا ينظر إن كان في بلد وزمان كان الغالب فيه هو الحلال في أسواقهم ليس على المشتري أن يسأل أنه حلال أم حرام ويبنى الحكم على الظاهر، وإن كان الغالب هو الحرام أو كان البائع رجلا يبيع الحلال والحرام يحتاط ويسأل أنه حلال أم حرام اھ (الباب العشرون في البياعات المكروهة والأرباح الفاسدة، ج3،ص210، ط:ماجدیۃ)۔
وفی شرح النووی علی صحیح مسلم: فیہ بیان قاعدۃ مھمۃ وھی انہ اذا حصل الشک فی الذکاۃ المبیحۃ للحیوان لم یحل، لان الاصل تحریمہ، وھذا لاخلاف فیہ اھ (ج13،ص 78، ط: دار احیاء التراث)