گھریلو معاملات درست نہ ہونے پر بیوی کا شوہر سے الگ گھر کا مطالبہ کرنا

السلام علیکم ! میری شادی کو ایک سال اور تین مہینے ہوچکے ہیں اور میری ساس اور میرے تعلقات اچھے نہیں ہیں اور کافی کوشش کے باوجود بھی بہتری نہیں آرہی ہے جس کی وجہ سے ہر دو تین مہینے بعد مجھے اپنے میکے میں رہنا پڑتا ہے ، میں اپنے شوہر سے الگ گھر کا مطالبہ کر رہی ہوں ، کیونکہ ان کے دو بھائی اور بھی ہیں تو میری ساس اکیلی تو نہیں ہوں گی ، لیکن میرے شوہر الگ گھر نہیں کرنا چاہ رہے ہیں اور مجھے اس گھر میں رہنے کے لئے مجبور کر رہے ہیں نہیں تو طلاق دے دیں گے ، لیکن میرا اس گھر میں رہنا مشکل ہوگیا ہے ، اس صورتحال میں میری رہنمائی فرمادیں اور جواب تھوڑا جلدی دیں، کیونکہ میرے شوہر نے مجھے دس دن کا وقت دیا ہے ، اگر میں نے کوئی فیصلہ نہیں کیا تو وہ مجھے طلاق دیں گے۔

الجوابُ حامِدا ًو مُصلیِّا ً

سائلہ اور اس کی ساس کے درمیان اگر واقعۃً تعلقات خراب ہوں اور ہر ممکن کوشش اور صبر و تحمل کے باوجود تعلقات دن بدن مزید خراب ہوتے جارہے ہوں تو اس صورت میں سائلہ کا اپنے شوہر سے الگ رہائش کا مطالبہ کرنا شرعاً درست اور بیوی کا حق ہے ، اس لئے شوہر کو چاہیئے کہ وہ اپنی بیوی کو الگ مکان میں رہائش کا انتظام کر کے دے ، اگر الگ مکان کا بندوبست مشکل ہو تو ایسی صورت میں اسی گھر میں رہتے ہوئے ایک کمرہ ، اٹیچ باتھ روم اور کچن کے ساتھ دے دے ، تاکہ وہ اپنا سامان اس میں رکھ کر تالا لگا سکے ، جبکہ شوہر کا طلاق دینے کی دھمکی دینا شرعاً درست نہیں جس سے احتراز لازم ہے۔

مأخَذُ الفَتوی

کما فی الھندیۃ : تجب السكنى لها عليه في بيت خال عن أهله وأهلها إلا أن تختار ذلك الخ ( ج۱، ص۵۵۶، کتاب الطلاق، الفصل الثانی فی السکنی ط۔ماجدیہ)۔
و فی رد المحتار : إن أمكنه أن يجعل لها بيتا على حدة في داره ليس لها غير ذلك،الخ (ج۳، ص۶۰۱، کتاب الطلاق، باب النفقۃ، ط۔سعید)۔
و فی الھدایۃ : فصل " وعلى الزوج أن يسكنها في دار مفردة ليس فيها أحد من أهله إلا أن تختار ذلك " لأن السكنى من كفايتها فتجب لها كالنفقة وقد أوجبه الله تعالى مقرونا بالنفقة (الی قولہ) ولو أسكنها في بيت من الدار مفرد وله غلق كفاها لأن المقصود قد حصل " وله أن يمنع والديها وولدها من غيره وأهلها من الدخول عليها "الخ ( ج۲، ص۲۸۸، کتاب الطلاق، باب النفقۃ، ط۔ دار أحیاء بیروت)۔
و فی البحرالرائق و حاشیۃ منحۃ الخالق : أي الإسكان للزوجة على زوجها؛ لأن السكنى من كفايتها فتجب لها كالنفقة، (الی قولہ) ليس له أن يشرك غيرها فيه؛ لأنها تتضرر به الخ (ج۴، ص۲۱۰، باب النفقۃ، ط۔دارالکتاب)۔