یو پیسہ ایپ اسپین گھماکر ملنے والے پیسوں کا حکم

السلام علیکم!upaisa ایک ایپ ہے، جس میں 12 گھنٹے بعد سپین کرنے پر سرکل میں اماؤنٹ لکھی ہوتی ہے،(01،05،10،15،25،50،500)ان میں سے جس پر بھی تیر رک جائے،12 گھنٹے بعد وہ پیسے آپ کے اکاؤنٹ میں آجاتے ہیں،پھر اس کو دوسرے اکاؤنٹ میں ٹرانسفر کرکے کبھی پیکج کرنے کیلئے استعمال کرتے ہیں،اور کبھی ذاتی استعمال کیلئے،تو کیا اس ایپ سے یہ پیسے استعمال کرنا جائز ہے؟جائز و ناجائز دونوں صورتوں میں رہنمائی کیجئے۔

الجوابُ حامِدا ًو مُصلیِّا ً

صورتِ مسئولہ میں اگر uPaisa ایپ میں محض تشہیری انعام کے طور پر بغیر کسی رقم داؤ پر لگائے"Spin"کرنے پر کمپنی کی طرف سے رقم دی جاتی ہو؛ تواس صورت میں یہ رقم کمپنی کی جانب سے انعام شمار ہوگی، جس کے لینے اور استعمال کرنےکی شرعاًگنجائش ہے۔
البتہ اگر اس اسکیم کی حقیقت"ون روپی گیم"اور اسی نوع کے دیگر قرعہ اندازی والے معاملات کی طرح ہوکہ صارف کسی انعام یا رقم کے حصول کی امید پر رقم ادا کرے، پھر قرعہ اندازی کےطریقہ سے کسی ایک یا چند افراد کو رقم یا انعام دیا جائے، اور باقی لوگ محروم رہ جائیں، تو یہ معاملہ شرعاً "قمار" (جوا) کے حکم میں داخل ہوگا، جو ناجائز و حرام ہے۔جس سے احترازلازم ہے۔

مأخَذُ الفَتوی

کما فی الرد: لأن القمار من القمر الذي يزداد تارة وينقص أخرى، وسمي القمار قمارا لأن كل واحد من المقامرين ممن يجوز أن يذهب ماله إلى صاحبه، ويجوز أن يستفيد مال صاحبه وهو حرام بالنص(کتاب الحضر والاباحۃ،فصل فی البیع، ج:6، ص:403، ط:سعید)
وفی مرقاۃ المفاتیح شرح مشکاۃ المصابیح: القمار كون الرجل مترددا بين الغنم والغرم (کتاب الجھاد، باب اعداد آلۃ الجھاد،ج:6،ص:2505،ط:دارالفکر)