سالی سے ناجائز تعلق رکھنے والے شوہر کی بیوی کو کیا کرنا چاہیئے؟

میرا شوہر تین سال سے میری بہن ( یعنی اپنی سالی ) کے ساتھ زنا کر رہا تھا ، مجھے اب پتہ چلا کہ میرا شوہر میری بہن سے ناجائز تعلق میں تھا ، تو میں کیا بطور اس کی بیوی اپنے شوہر پر حلال ہوں یا نہیں؟ اور مجھے اسلامی نقطۂ نظر سے کیا کرنا چاہیئے؟

الجوابُ حامِدا ًو مُصلیِّا ً

سائلہ کے شوہر کا اپنی سالی کے ساتھ ناجائز تعلقات اور زنا جیسے کبیرہ گناہ کا ارتکاب کرنا شرعاً ناجائز اور حرام فعل ہے ، اگر اسلامی قانون نافذالعمل ہوتا تو اس جرم کے ثبوت کے بعد سائلہ کے شوہر اور اس کی بہن پر شرعی حد بھی جاری ہوتی ، لہٰذا سائلہ کے شوہر کو اپنے اس فعلِ حرام کے ارتکاب پر اللہ کے حضور بصدقِ دل توبہ و استغفار اور آئندہ کے لئے مکمل اجتناب لازم ہے،تاہم اس کی وجہ سے سائلہ کا اپنے شوہر کے ساتھ نکاح متاثر نہیں ہوا ، بلکہ دونوں حسبِ سابق ازدواجی زندگی بسر کرسکتے ہیں ، البتہ سائلہ کو چاہیئے کہ اپنے شوہر کے ساتھ ساتھ اپنی بہن کو بھی سمجھائے کہ وہ اس کے شوہر سے دور رہے ، تاکہ آئندہ کے لئے اس فعل کے ارتکاب سے بچا جاسکے ۔

مأخَذُ الفَتوی

قال اللہ تعالی : الزانية و الزاني فاجلدوا كل واحد منهما مائة جلدة و لا تأخذكم بهما رأفة في دين الله إن كنتم تؤمنون بالله و اليوم الآخر و ليشهد عذابهما طائفة من المؤمنين اھ ( النور : 2 )۔
کما فی احکام القرآن للجصاص : و اختلف أهل العلم في حد المحصن و غير المحصن في الزنا فقال أبو حنيفة و أبو يوسف و زفر و محمد يرجم المحصن و لا يجلد و يجلد غير المحصن و ليس نفيه بحد و إنما هو موكول إلى رأي الإمام إن رأى نفيه للدعارة فعل كما يجوز حبسه حتى يحدث توبة اھ ( ج 3،صـــ 422 ) ۔
و فی الدر المختار مع الشامیۃ : و فی الخلاصۃ : وطئ أخت امرأتہ لاتحرم علیہ امرأتہ و قولہ : لاتحرم أی لاتثبت حرمۃ المصاھرۃ إلخ ( ج 3 ، صـــــ 34 ) ۔