بُرے وسوسے آنا

مسئلہ یہ ہے کہ میں ایک جگہ بہت اچھی نوکری کررہا تھا کہ اچانک مجھے دبئی سے آفر آگئی، میں نے استخارہ کیا اور اللہ تعالیٰ سے اپنے طور پر گذارش کی کہ جو بھی میرے لیے بہتر ہے وہ ظاہر کردے پھر چند مہینے پہلے میں اپنی نوکری سے استعفیٰ دے کر دبئی آگیا، اب یہاں پہنچ کر دو مہینے میں میری ملازمت ختم ہوگئی، اور میں واپس جارہا ہوں، معلوم یہ کرنا ہے کہ یہ کیا ہے؟ نہ میرے پاس پاکستان میں روزگار ہے نہ یہاں، کیایہ میرے گناہ کی سزا ہے یا آزمائش ہے؟ یا کسی کی بددعا ہے؟ یا پھر ہم پر کسی کی نظر لگ گئی ہے؟ برائے مہربانی میری رہنمائی فرمائیں اور اس مشکل سے نکلنے میں میری مدد فرمائیں وظائف اور اذکار کے ذریعے، اب دل اتنا مایوس لگتا ہے کہ کسی عبادت میں بھی دل نہیں لگتا، اللہ تعالیٰ سے دعا کرنے کا بھی دل نہیں چاہتا، استخارہ کا بھی یقین ختم ہورہا ہے اور طرح طرح کے وسوسے مجھے اللہ تعالیٰ سے دور کررہے ہیں، میری رہنمائی بھی فرمائیے اور میرے لیے دعا بھی فرمادیں۔

الجوابُ حامِدا ًو مُصلیِّا ً

راحت اور مصیبت ہر انسان کی زندگی کا جزء ہوتا ہے، ان کی بناء پر اتنا پریشان ہونا کہ اللہ سے مایوس ہونے لگے درست نہیں، اس لیے سائل کو چاہیے کہ اللہ کی طرف رجوع کرے اور ہر حال میں اللہ تعالیٰ سے رضا مندی کا اظہار کرے اور ہر قسم کے بُرے خیالات اور وساوس سے اپنے دل و دماغ کو پاک رکھے، نماز پنجگانہ کے اہتمام کےساتھ صبح و شام اکتالیس مرتبہ سورہ قریش اور اکتالیس مرتبہ ’’یا عزیز‘‘ پڑھا کرے، انشاء اللہ مفید رہے گا۔

مأخَذُ الفَتوی

قال اللہ تعالٰی فی کتابه الکریم بلسان نبیه یعقوب: {وَلَا تَيْأَسُوا مِنْ رَوْحِ اللَّهِ إِنَّهُ لَا يَيْأَسُ مِنْ رَوْحِ اللَّهِ إِلَّا الْقَوْمُ الْكَافِرُونَ} [يوسف: 87] واللہ اعلم!