شوہر کا نکاح کے بعد رخصتی نہ کرنے کا حکم

السلام علیکم ورحمۃ اللہ وبرکاتہ،عرض خدمت یہ ہے کہ چھ(6) سال پہلے میری بیٹی کا رشتہ طے ہوا، اور نکاح بھی فوراً ہوگیا، اور لڑکے والوں کی طرف سے تقریباً ڈیڑھ سال بعد رخصتی کا وقت مانگا گیا، جو کہ ہم نے دے دیا،لہذا بعد ازاں انہوں نے پانچ سال تک رخصتی نہیں کی، پانچ سال بعد ہم نے لڑکے کے گھر والوں کو بلایا، تو اس وقت بھی لڑکے نے رخصتی سے انکار کردیا، پھر لڑکے کے گھر والوں نے گواہان کی موجودگی میں لڑکے کا بیان حلفی لکھوایا کہ" اگر وہ 24 مئی 2026 ء تک رخصتی نہیں کریگا تو اسکے بھائی کو اختیار ہے کہ وہ اس کا نکاح ختم کرے" اب جب مذکورہ تاریخ آئی تو لڑکے والوں اور لڑکے نے صریح انکار کردیا کہ نہ میں رخصتی کرونگا، اور نہ میں طلاق دونگا،جو میرا کرنا ہے کرلو،لہذا مفتی صاحب اب 6 سال ہوگئے لڑکا میری بیٹی کو معلق رکھنا چاہتاہے،اب ہر طرح سے لڑکے کے رشتہ دار بھی ذمہ داری سے ہٹ گئے، اب جس بھائی کو اس نے بیان حلفی کی صورت میں اختیار دیاتھا وہ بھی انکاری ہے،یہ تمام ثبوت بیان حلفی ہمارے پاس موجود ہے،ہماری بیٹی کی زندگی کا سوال ہے ہم شریعت کی روشنی میں کیا اقدامات کریں؟

الجوابُ حامِدا ًو مُصلیِّا ً

صورتِ مسئولہ میں اگرسائل کی بیٹی کانکاح باقاعدہ گواہوں کی موجودگی میں حق مہرکے تقررکے ساتھ ہواہو تو شرعاً وہ نکاح درست منعقد ہوچکاہے، چنانچہ نکاح کے بعد لڑکےکا بارباررخصتی کاوعدہ کرکے اس کی خلاف ورزی کرنااوربلا عذر شرعی طویل عرصہ تک بیوی کو رخصت نہ کرنا اور نہ ہی آزاد کرناشرعاً سخت ناپسندیدہ اور ظلم کے مترادف ہے۔
اس صورت میں لڑکے پر لازم ہے کہ یا تو معروف طریقے سے بیوی کے حقوق ادا کرتے ہوئے گھر بسانے اور ازدواجی زندگی کو قائم کرنےکی فکر کرے، یا اگر وہ کسی وجہ سے نباہ نہیں کر سکتا تو اچھے طریقے سے طلاق دے کر اسے آزاد کردے، تاکہ وہ کسی دوسری جگہ نکاح کرکے اپنی زندگی عفت اورپاکدامنی کے ساتھ گزار سکے۔
لیکن اگر لڑکا ان دونوں میں سے کسی بھی طریقے پر آمادہ نہ ہو تووہ حکماً متعنت شمار ہوگا، لہٰذا ایسی مجبوری میں مذکور عورت کو نان نفقہ نہ دینے اور حقوق کی ادائیگی نہ کرنے کی بنیاد پر بذریعہ قضاءِ قاضی فسخ نکاح کا حق حاصل ہوگا،جس کا طریقہ یہ ہے کہ مذکور عورت اپنا مقدمہ مسلمان حاکم ( جج ) کے سامنے پیش کرے اور جس کے سامنے یہ مقدمہ پیش ہو ، وہ معاملہ کی شرعی شہادت وغیرہ کے ذریعہ پوری تحقیق کرے اور اگر عورت کا دعوٰی صحیح ثابت ہوجائے تو اس کے خاوند سے کہا جاوے کہ اپنا گھر بسا کر بیوی کے حقوق ادا کرو یا طلاق دو، ورنہ ہم تفریق کردیں گے، اس کے باوجود اگر وہ ظالم کسی صورت پر عمل کرنے کو تیار نہ ہو تو بغیر کسی انتظار و مہلت کے قاضی اس کا قائم مقام بن کر اس کی بیوی پر طلاق واقع کردے، چنانچہ ایسا کرنے سے اس عورت پر ایک طلاقِ بائن واقع ہوجائے گی، اور عورت ایام عدت گزارے بغیر ہی دوسری جگہ نکاح کرنے میں آزاد ہوگی۔

مأخَذُ الفَتوی

کما فی الحیلۃ الناجزۃ: " وأما المتعنت الممتنع عن الإنفاق ففي مجموع الأمير مانصه:إن منعها نفقة الحال فلها نفقة القيام فإن لم يثبت عسره أنفق أو طلق وإلا طلق عليه.قال محشيه قوله:وإلا طلق أي طلق عليه الحاكم من غير تلوم إلي أن قال:وإن تطوع بالنفقة قريب أوأجنبي فقال ابن القاسم لها أن تفارق لأن الفراق قد وجب لها.وقال ابن عبدالرحمن لا مقال لها لأن سبب الفراق هو عدم النفقة قد انتهي وهو الذي تقضيه المدونة كما قال ابن المناصف۔"(الروایۃ الثالثۃ والعشرون،ص:159،ط:دار الاشاعت)
وفی الدر: «هي لغة: ما ينفقه الإنسان على عياله وشرعا: (هي الطعام والكسوة والسكنى) وعرفا هي: الطعام (ونفقة الغير تجب على الغير بأسباب ثلاثة: زوجية، وقرابة، وملك) بدأ بالأول لمناسبة ما مر أو؛ لأنها أصل الولد (فتجب للزوجة) بنكاح صحيح، فلو بان فساده أو بطلانه رجع بما أخذته من النفقة بحر (على زوجها) ؛ لأنها جزاء الاحتباس، وكل محبوس لمنفعة غيره يلزمه نفقته (الی قولہ) «(ولو صغيرا)۔۔۔۔۔۔۔۔ «(لا يقدر على الوطء) لأن المانع من قبله (أو فقيرا ولو) كانت (مسلمة أو كافرة أو كبيرة أو صغيرة تطيق الوطء) أو تشتهي للوطء فيما دون الفرج، حتى لو لم تكن كذلك كان المانع منها فلا نفقة كما لو كانا صغيرين (فقيرة أو غنية موطوءة أو لا) كأن كان الزوج صغيرا أو كانت رتقاء أو قرناء أو معتوهة أو كبيرة لا توطأ، وكذا صغيرة تصلح للخدمة أو للاستئناس (إن أمسكها في بيته عند الثاني واختاره في التحفة؛ ولو منعت نفسها للمهر) دخل بها أو لا ولو كله مؤجلا عند الثاني وعليه الفتوى كما في البحر والنهر، وارتضاه محشي الأشباه؛ لأنه منع بحق فتستحق النفقة (بقدر حالهما) به يفتى،(ولو هي في بيت أبيها) إذا لم يطالبها الزوج بالنقلة به يفتى وكذا إذا طالبها ولم تمتنع أو امتنعت (للمهر أو مرضت في بيت الزوج) فإن لها النفقة استحسانا لقيام الاحتباس،الخ
(کتاب الطلاق،باب النفقہ،ج:3، ص:573،ط:سعید)