دین پر عمل کرنے والے کے لئےگھر والوں کا نامناسب رویہ اپنانا اور ناراض ہونا

میں شدید ذہنی دبا ؤ میں ہوں ، جس کو الفاظ میں بیان نہیں کر سکتا ، یہ سوال لکھتے وقت بھی میں رو رہا ہوں، وجہ یہ ہے کہ میرے گھر والے میرے دین کو فالو کرنے میں کچھ چیزوں میں بہت غلط رویہ رکھتے ہیں، جس سے مجھے شدید تکلیف ہوتی ہے ، جیسے ٹی وی پر ناچ گانا چل رہا ہوتا ہے تو میں وہاں کھانا کھانے سے منع کرتا ہوں تو بہت سخت غصہ کرتے ہیں مجھ پر، تبلیغ میں جانے نہیں دیتے، غریبوں کو گرم کپڑے دےکر آیا تو اس پر منع کر رہے ہیں کہ ان کو ضرورت نہیں ہوتی، ایسے مدد نہیں کرو ، اور میں جب مدد کرکے آیا تو سب کا منہ بنا ہوا تھا کہ کیوں کر رہا ہے یہ کام ؟ سب کے پاس ہے ، کسی کو ضرورت نہیں ، اور میں جب سے دین پر آیا ہوں ، مجھے عجیب سا بنا دیا، ان سب باتوں کی وجہ سے شدید ڈپریشن میں ہوں ، اور روتا رہتا ہوں ، آپ اگر مدد کردیں گے میری تو میں اﷲ سے خوب دعا کروں گا آپ کےلئے ان شاء اللہ ، اور کچھ نہیں کرسکتا میں۔

الجوابُ حامِدا ًو مُصلیِّا ً

واضح ہو کہ احکامِ شرعیہ کی پابندی کرتے ہوئے بُرائی اور ممنوع امور سے بچنا اور خیر و بھلائی کے کاموں میں آگے بڑھنا ایک مسلمان کی بنیادی ذمہ داری ہے ، جس کی وجہ سے اخروی کامیابی انسان کی مقدر بنتی ہے ، اور یہ ایک مسلمان کا مقصد ہونا چاہیئے ، لہٰذا احکامِ شرعیہ کی پاسداری کرتے وقت سائل کو گھر والوں کی طرف سے جس نامناسب رویہ کا سامنا کرنا پڑرہا ہے اس پر تکلیف اور صدمہ پہنچنے کی وجہ سے صبر کرتے وقت سائل کے اجر و ثواب میں مزید اضافہ ہورہا ہے ، البتہ سائل کے گھر والے اپنے اس غیرشرعی طرزِ عمل سے گنہگار ہورہے ہیں ، اس لئے سائل صبر و استقامت کے ساتھ احکامِ شرعیہ کی پابندی اور خیر و بھلائی کے کاموں میں آگے بڑھنے کی کوشش جاری رکھے ، اور اس کے ساتھ ساتھ گھر والوں کو حکمت کے ساتھ سمجھانے اور ان کے حق میں بہتری کی دعاؤں کا بھی اہتمام کرے ، ان شاء اللہ وقت کے ساتھ سب بہتر ہوجائے گا ۔